అందం

తులసిమొక్క ఇంటిముందు ఉంటేనే అందం
వాకిట్లో రంగవల్లి కంటేనే అందం

సౌందర్యం చిరునామా ఇంట్లోనే ఉందోయ్ 
తనువంతా పసుపు రాసుకుంటేనే అందం 

బూస్టులోన ఏముందో ఎఱుకలేదు సీక్రెట్ 
పొద్దున్నే చద్దన్నం తింటేనే అందం

పసిపిల్లల హాసంలో ఉంటుందోయ్ స్వర్గం 
చంటిపాపలెపుడు నవ్వుతుంటేనే అందం
   
పెద్దవారి మాట వింటె అదే గెలుపు మంత్రం 
ఇంటిలోన పెద్దదిక్కులుంటేనే అందం

వందమంది కొడుకులుండి ఏంలాభం తల్లికి 
రాముడంటి కొడుకునొకని కంటేనే అందం 

ఈడూరీ తెల్లదొరలు వెళ్ళిపోయిరెపుడో 
ఇండియాని భరతదేశమంటేనే అందం

నమ్మకురోయ్

ఏటియెమ్ములొ డబ్బున్నట్టుగ కలలొస్తుంటె నమ్మకురోయ్
చక్కనిచుక్క తనకుతానుగ వలచొస్తుంటే నమ్మకురోయ్

లక్ష్మిదేవికి నీపైప్రేమ పెరిగనదేంటి అనుకోమాక
కోట్లకుకోట్లు గెలిచినట్టుగ మెయిలొస్తుంటే నమ్మకురోయ్

నల్లధనాన్ని దాచాలంటె మార్గాలెన్నొ వేలకువేలు
పక్కింటోడు లక్షల్లక్షలు పిలిచిస్తుంటె నమ్మకురోయ్

నేతలందరు గొప్పోళ్ళురా వారికినీకు పోలికలేదు
బీకాములో ఫిజిక్సు లెసను చదివానంటే నమ్మకురోయ్

కొత్తగ పెళ్ళి అయినవాడికి కోతిక్కొబ్బరి దొరికినట్టు 
భార్య చక్కగ చెప్పినవన్ని చేసేస్తుంటే నమ్మకురోయ్

నువ్వు లేకుంటే

ఈ వన్నెలు అంటేవా పొదరిళ్ళకి, నువ్వు లేకుంటే 
ఈ ముగ్గులు వుండేవా వాకిళ్ళకి, నువ్వు లేకుంటే

అందాలను పొందికగా ఏరికూర్చినట్టి రూపానివి  
ఈ విందులు అందేవా నాకళ్ళకి, నువ్వు లేకుంటే

ఊపిరాగిపోయేనా అనిపించే తీపి పరవశాలు 
ఈ బిగువులు దక్కేవా కౌగిళ్ళకి, నువ్వు లేకుంటే

మనకలయిక అతిమధురం శుభతరుణం ప్రేమ రాజ్యానికి  
ఈ పసుపులు తగిలేవా మావిళ్ళకి, నువ్వు లేకుంటే

వలపంతా రంగరించి నిధిలాగా పోత పోసినాను    
సిరిబిందెలు చేరేవా కావిళ్ళకి, నువ్వు లేకుంటే

ఉంటావూ

చిగురించిన గజలులాగ వెంటాడుతు ఉంటావూ 

మనసులోని భావంలా మాటాడుతు ఉంటావూ  

అద్దంలో చూసుకుంటె నీలానే ఉంటున్నా  

అనుక్షణం నాలోనే తారాడుతు ఉంటావూ

సద్దులేని భాషలాగ మౌనంగా ఉంటూనే 

నీ ఉనికిని కోరుకుంటు పోరాడుతు ఉంటావూ

నిన్ను వదలి ఉండలేను అదినాకూ తెలుసునులే 

జ్ఞాపకాల గొలుసుపట్టి వేలాడుతు ఉంటావూ 

నీ చెంతలొ ఈడూరికి ఏచింతా ఉండదులే 

నీడలాగ వెన్నంటీ కాపాడుతు ఉంటావూ

బాల్యం

పుస్తకాల సంచిలోనె నాబాల్యం నలుగుతోంది
ఆరుబయట ఆడుకునే సౌకర్యం కరుగుతోంది

రంగు రంగు బట్టలతో పెరగాల్సిన వయసులోన
సర్కసులో జోకరులా ఆహార్యం మిగులుతోంది

వేలికొనల మీద నేడు ప్రపంచమే ఆడుతోంది
గదిగోడల మధ్యలోనె నామాన్యం వెలుగుతోంది

తల్లిదండ్రి కర్కశులై హాస్టల్లో పడవేస్తే
మమతలకే దూరంగా నారాజ్యం రగులుతోంది

పిల్లలంటె భూమి మీద దేవతలే ఈడూరీ
రానురాను పసివాళ్ళకి ఆ భాగ్యం తరుగుతోంది

ముద్దొస్తావ్

గోరింటను పెట్టుకున్న చేతులతో ముద్దొస్తావ్
పసిపాపను తలపించే చేతలతో ముద్దొస్తావ్ 

పరుచుకున్న మౌనంతో ఏకాకిగ నేనుంటే 
ప్రేమలొలుకు నీతియ్యని మాటలతో ముద్దొస్తావ్ 

మధువులనే తాగేసిన మధుపమువే నీవేమో 
పెదవులు పంచే తేనెల ఊటలతో ముద్దొస్తావ్ 

చిగురాకులు తినిపెరిగిన కోయిలవే అనుకుంటా 
వసంతాలు కురిపించే పాటలతో ముద్దొస్తావ్

ఈడూరికి రసారణ్య కేసరివే భామినీ 
రాసలీల వినోదాల వేటలతో ముద్దొస్తావ్ 

ఇంకొక దీపావళి గజల్

చీకటితో వెలుగు చేయు పోరాటం దీపావళి
టపాసులే కాల్చుకునే ఆరాటం దీపావళి

బాంబులన్ని కాల్చేసీ కాలరెత్తి తిరగాలని
మరదలెదుట బావగారి ఉబలాటం దీపావళి

దొరికినన్ని టపాసులూ కొనితెచ్చుకోవాలాని
పిల్లకాయలందరికీ బులబాటం దీపావళి

కళ్లుచెదురు ధరలతోటి చిల్లులున్న జేబుతోటి
సగటు మనుషులెదుర్కొనే పితలాటం దీపావళి

ఆనందం ఎంతున్నా ఈడూరీ నిజానికీ
శివకాశీ శ్రామికులకు చెలగాటం దీపావళి