Saturday, August 27, 2016

తప్పేం కాదోయ్

అడపా దడపా అల్లరి చేయుట తప్పేం కాదోయ్
నీలో బాలుని బయటికి లాగుట తప్పేం కాదోయ్    

దైవం కన్నులు ఇచ్చినదెందుకు చూచుటకేగా 
అందం చూసీ లొట్టలు వేయుట తప్పేం కాదోయ్  

నిత్యం సైనిక పాలన అంటే కష్టం కాదా
నియమం సంకెల నిలువున తెంచుట తప్పేం కాదోయ్ 

పెద్దలు మాత్రం పిల్లలు కారా సరదాకైనా
పుల్లల ఐసును ఫుల్లుగ చీకుట తప్పేం కాదోయ్

సినిమాకెడితే చేతులు ముడుచుకు కూచుంటారా
ఐటెం సాంగుకు ఈలలు కొట్టుట తప్పేం కాదోయ్ 

బోడిగ గుండును చూస్తూ ఊరికె వదిలెయగలమా 
టోపీ లాగీ ఒక్కటి మొట్టుట తప్పేం కాదోయ్ 

నిజాలు పలికిన రాజుకి దక్కెను స్మశాన వాటిక
అవసరానికో అబధ్ధమాడుట తప్పేం కాదోయ్

Thursday, August 11, 2016

సులువుకదా!

ఆనులైను సదుపాయం తెలుసుకుంటె సులువుకదా 
పెళ్ళిళ్ళకు టెక్నాలజి వాడుకుంటె సులువుకదా

పెళ్ళికొరకు పేరయ్యల వెంటపడగ పనేలేదు   
మ్యాట్రిమొనీ సైటులనే నమ్ముకుంటె సులువుకదా

మిఠాయిలూ బూందీలతొ పెళ్ళిచూపులెందులకూ
స్కైపులోన ఇద్దరినీ చూపుకుంటె సులువుకదా 

ఇంటింటికి తిరుగుకుంటు పెళ్ళిపిలుపు పిలువనేల
వాట్సప్పులొ ఫొటోపెట్టి పిలుచుకుంటె సులువుకదా 

బోలెడంత డబ్బుపెట్టి బంధువులను పిలవాలా
వెబ్బుక్యాస్ట్ చేసి పెళ్ళి చూపుతుంటె సులువుకదా 

పెళ్ళిఫొటోల్దాచుకొనగ ఆల్బమ్ములు అవసరమా  
గూగులమ్మ డ్రైవులోన దాచుకుంటె సులువుకదా

హనీమూనుకెళ్ళేందుకు గాభరాలు పడనేలా
ప్యాకేజీ వెతుక్కునీ జారుకుంటె సులువుకదా  

Tuesday, August 9, 2016

ఉంటుంది

ఎదుట నిలిచి నవ్వుతుంటె అమ్మలాగ ఉంటుంది
చీర కట్టుకున్న బాపు బొమ్మలాగ ఉంటుంది

ఆ అందం ఆ రూపం ఏమంటూ పొగడాలి
కాళిదాసు కవితలున్న కమ్మలాగ ఉంటుంది

నూలు చీర పట్టు చీర ఏదైనా ఏముంది
విరబూసిన మల్లెపూల కొమ్మలాగ ఉంటుంది

సిగ్గులతో నునుపెక్కిన చెక్కిలిదే సోయగము
మంచు పడ్డ గులాబీల రెమ్మలాగ ఉంటుంది

సౌందర్యం చిరునామా ఈడూరికి దొరికింది
సొగసులో అప్సరల జేజమ్మలాగ ఉంటుంది