ఢిల్లీ గ్యాంగ్ రేప్ భాదితురాలికి అశ్రు నివాళి

ఆరు రాబందులు నీమీద పడి కుళ్ళబొడిచినా
నువ్వు ధైర్యంగా బతుకు పోరాటం చేశావు
నిద్రాణమై ఉన్న ఈ దేశ యువతని
కదన రంగం వైపు మరల్చి
నువ్వు కొవ్వొత్తిలా కరిగిపోయావు
ఓ యోధురాలా నీ దేహం నేలకొరిగినా
నీవందించిన చైతన్యం బతికే ఉంది
బతికే ఉంటుంది............

ప్రపంచ తెలుగు మహాసభల సందర్భంగా..........

నింగిలో నెలవంకలా

చంటిపాప నవ్వులా

కొలనులో కలువలా

అడవిలో నెమలిలా

అందమైన భాష

పోతనగారి పద్యంలా

వాణి వీణా వాద్యంలా

వీరేశలింగం గద్యంలా

ఎన్నోఏళ్ళ మద్యంలా

మత్తెక్కించే భాష

బాపు గీసిన గీతలా

రమణగారి రాతలా

రామలింగడి మాటలా

సాక్షివారి చురకలా

కోణంగి కొంటెభాష

శ్రీనాధుని శ్రుంగారం

అమ్మలోని మమకారం

రాయలవారి రాజసం

ఆవుపాల పాయసం

రంగరించిన తీపి భాష

శ్రీశ్రీ ఆవేశం

అన్నమయ్య పారవశ్యం 

నండూరి ఎంకిపాట

అవధానం, హరికధల విరితోట

ఉగ్గుపాల ఒగ్గుకధల భాష

దేశభాషలందు లెస్స

పలుకరా హైలెస్సా

తేనెలొలుకు మధురభాష

అచ్చమైన తెలుగుభాష 

అప్పడిగే మన అప్పారావు
ఎపుడో కలిసిన సుబ్బారావు
పక్కింటి పిన్నిగారు
చొంగ కార్చే తాతగారు
వీళ్ళంతా మన బాపు బొమ్మలే 

కాణిపాకం గణపయ్య
తిరుమల వెంకయ్య
భద్రాచల రామయ్య 
శ్రీశైలం శివయ్య 
వీళ్ళంతా మన బాపు బొమ్మలే 

శ్రుంగారమొలికించే దంపతులు
గోముగా చూసే దమయంతులు
స్నానాలు చేసే ఇంతులు
నక్కి నక్కి చూసే పంతులు
వీళ్ళంతా మన బాపు బొమ్మలే  

తెలుగుతనం గీయాలన్నా
తెలుగురాత రాయాలన్నా
తెలుగనేది ఎన్నాళ్ళున్నా
నిన్న నేడు రేపు
మనకుంటాడు బాపు!!!!
(బాపు గారికి పుట్టినరోజు శుభాకాంక్షలతో....) 

షిర్డిసాయి మంగళహారతి

మంగళము సాయినాధకి ద్వారకామయి నివాసికి 
మంగళము అఖిలాండకోటి నాయకునకు 
మంగళము సాయినాధకి ద్వారకామయి నివాసికి 
మంగళము అఖిలాండకోటి నాయకునకు  

మంగళము భక్తజన శులభునకు 
మంగళము భక్తజన శులభునకు   
మంగళము షిర్డిపురాధీశునకును 

జయమంగళం నిత్యశుభమంగళం
జయమంగళం నిత్యశుభమంగళం
జయమంగళం నిత్యశుభమంగళం
జయమంగళం నిత్యశుభమంగళం

కాఫీ

తెలవారుతూనే పొగలు కక్కే కాఫీ
ఒక్కటుచ్చుకుంటే నీ రోజంతా హ్యాపీ
కసబ్ లాంటి కరుడు గట్టిన పాపి
ఒక్క కాఫీతో కౌగలిచుకోడా నిను చెయి జాపి
పెళ్ళిచూపుల్లో అమ్మాయిస్తే కాఫీ
లైఫంతా అయిపోతుంది సాఫీ
ఇంటికి పిలిచి ఆఫీసరుకిస్తే కాఫీ
మేనేజరు సీటులో పెడతాడు నిన్ను లేపి
మంత్రిగారికిస్తే మంచి కప్పు కాఫీ
రైతుల రుణాలన్నీ ఒక్క గంటలో మాఫీ

చాలదా?

ప్రేమకు ఎవరైతే ఏమిటి మనసుంటే చాలదా?
దేవుడు ఎవరైతే ఏమిటి గురి వుంటే చాలదా?

నేనెక్కువ నువు తక్కువ అన్నదెవరు నేస్తమా
ప్రాంతాలు ఏవైతే ఏమిటి కలిసుంటే చాలదా?

మానవ జన్మన్నది  దేవుడిచ్చిన వరమేగా
కులమేదైతే ఏమిటి మనిషిగ వుంటే చాలదా?

పుస్తకాలు తిరగేస్తే ఆత్మ శుద్ధి అవుతుందా   
చదువేదైతే ఏమిటి విజ్ఞత వుంటే చాలదా?

సేవే గమ్యమైతే అధికారం మార్గమా 
పదవేదైతే ఏమిటి పాటవముంటే చాలదా? 

అలుపెరుగక అనుకున్నది రాసెయ్ ఈడూరీ
అవార్డు రాకుంటే ఏమిటి చప్పట్లుంటే చాలదా? 

వలపు

నీ వలపు మది తాకిన సమీరం లాగుంది
ఆ తలపు నను వీడని భ్రమరం లాగుంది


నీ చూపు తాకగానె శిలనైన నాకు
కన్ను కన్ను కలపడమే సమరం లాగుంది


ప్రేమ అనే పదానికి ఇంత పటిమ ఎక్కడిదో
ఆ ఊహే వేసవిలో శిశిరం లాగుంది


ఎంత కాదన్నా నీ వెంటే నడుస్తున్నా
నీ తీరే అసమ్మతి శిబిరం లాగుంది


ఇన్ని నెలల నిరీక్షణ ముగిసేనా తొందరలో
నీ వాలుచూపు ప్రేమాలయ శిఖరం లాగుంది


చెరిగిపోని ప్రణయాలు చరిత్రలో ఎన్నున్నా
ఈడూరీ, నీ కధ అమరం లాగుంది

మరణం తరువాత

చూడాలని ఉంది నాకు చందమామ వెనుక కూడా
చేరాలని ఉంది నాకు దిగంతాల ఆవల కూడా

ఉరకలేసే లేత మనసు అణిగి మణిగి ఉండలేదు   
ఆడాలని ఉంది నాకు బాల్యం  తరువాత కూడా

మనసు తోడు రాకుంటే విజయానికి విలువెక్కడిది
గెలవాలని ఉంది నాకు ఓటమి తరువాత కూడా

ప్రేమ అమరమనుకుంటే అంతమన్న మాటెందుకు
రమించాలనుంది నాకు ప్రణయం తరువాత కూడా

కానరాని లోకాలపై మమకారం నాకెందుకు
బతకాలని ఉంది నాకు మరణం తరువాత కూడా

పాట

ఏంది గురూ ఎదురింటావిడ యమాగ ఉంటుందీ
రోజురోజుకీ మా ఇంటావిడ బోరు కొడుతూందీ //ఏంది గురూ//

ఏ లేడీకేసి చూసినా బాడీ వేడిగ అవుతుందీ
శ్రీమతి వస్తే చల్లగ మారి చతికిలబడుతుందీ
అప్పుడెప్పుడో చక్కని చుక్క అన్నది గుర్తుందీ 
అదే మనిషిని ఇప్పుడుచూస్తే హిడింబ లాగుందీ  //ఏంది గురూ//

ఏం గొప్పోడని పక్కొడికి రంభే దొరికిందీ
నాకేమో ఈ ఏకు కాస్తా మేకై కూచుందీ
ఊరించే ఒంపుసొంపులు ఉన్నా లేకున్నా 
నాజూకైన పెళ్ళాన్నిస్తె దేవుడి సొమ్మేంపొయింది  //ఏంది గురూ// 

ప్రశ్నలు

ప్రశ్నలు ప్రశ్నలు ప్రశ్నలు
మదినిండా ప్రశ్నలు
మతిలేని ప్రశ్నలు
అనుమతిలేని ప్రశ్నలు

చేతిరేఖలే అద్రుస్జ్టమైతే
చేతులులేక బతకట్లేదా?
దేవుడే దిక్కని అందామంటే
చుట్టూ నాస్తికులు తిరగట్లేదా? 
మతమే ముఖ్యం అందామంటే
పశుపక్షులకెలా సమ్మతము?
దేవుడులేడని అందామంటే

స్రుష్టిని పూర్తిగ మరువడమా?

విద్యలు నేర్పును విజ్ఞత అంటే
లంచాలెందుకు మరగడము?
సైన్సు ప్రగతికి చిహ్నం అంటే
జబ్బులు ఎందుకు పెరగడము?
మానవుడే మహనీయుడంటే
రాకెట్లెందుకు నీట మునగడము?
గురువే దైవమైతే భక్తురాళ్ళను
బాబాలెందుకు గోకడము?

నగరం నిద్రపోతోంది

నగరం నిద్రపోతోంది

పేదోడి పొయ్యిలో మత్తుగా పడుకున్న పిల్లిలా

ధనవంతుడి ఇనప్పెట్టెలో మూలిగే డబ్బు సంచిలా  

సినిమా హీరోయిన్ పొద్దున్నెప్పుడో కొట్టుకున్న మేకప్పులా 

………………………………….నగరం నిద్రపోతోంది

అప్పుడే పుట్టిన బుడతడొకడు తానొచ్చేశానంటూ

గట్టిగా ఏడుస్తున్నాడు. ఏం ఉద్ధరిద్దామనో!!!  

కొత్త గౌనులో ఎలా ఉంటానో ఇప్పుడే కలగంటోంది

పుట్టినరోజు  చేసుకోబోయే మరో బుజ్జిపాప       

రేపొక్కరోజు బడికెడితే ఇంకో వారం రోజులు సెలవులు

అన్న మత్తులో జోగుతున్నాడు ఒక భావిభారత పౌరుడు  

…………………………………నగరం నిద్రపోతోంది

తన జీవార్తిని, దేహార్తిని తీర్చే మగాడి కోసం

వెతుకుతోంది లో బడ్జెట్ సినిమాలో నాయికలాంటి మగువ

బారు నుంచి బయటపడ్డ మందుబాబు

మరో కిక్కు కోసం అటువైపే వస్తున్నాడు

ఇంకొక్క కండోం అమ్మకం ఖాయం అని

ఆశగా చూస్తున్నాడు 24X7 మందులషాపు సేల్స్ మాన్  

………………………………….నగరం నిద్రపోతోంది  

వీధికుక్క ఒకటి విసుగ్గా అటూఇటూ తిరుగుతోంది

మొరగటానికి సరైన అవకాశమే దొరక్క

చేతివాటం తప్ప చమత్కారం తెలియని దొంగ ఒకడు

కన్నం వెయ్యటానికి సరైన ఇంటికోసం వెతుకుతున్నాడు

సీఐ గారింట్లొ బీటు పుస్తకంలో సంతకంపెట్టి వెనుతిరిగాడు

కానిస్టేబుల్ వెంకన్న ఈరోజుకి డ్యూటీ అయిందనుకుంటూ 

…………………………………నగరం నిద్రపోతోంది

ట్యాక్సీ డ్రైవరూ, టీకొట్టు సాయిలూ రాబోయే ఎన్నికలలో

వోటు ఎంత పలుకుతుందో లెక్కలేస్తున్నారు...ఎన్ని కలలో

నైటు షిఫ్టు నరేష్ వీకెండుని ఎలా ఎండుచెయ్యాలో అని

విపరీతంగా ప్లాను చేస్తున్నాడు.....అమ్మాయే ఖాయం కాలేదు

…..…………………………………నగరం నిద్రపోతోంది

ఆ ఒక్కటీ అందిస్తే ఈరోజుకి పతిసేవ పరిసమాప్తం 

అనుకుంటూ మొగుడి వైపుకి తిరిగింది ఒక ఇల్లాలు

కాటికి కాళ్ళు చాపిన ముసలివాడు దగ్గుతున్నాడు

రాత్రంతా దగ్గాలని మొక్కుకున్నాడేమో మరి!!!

 ………………………నగరం నిద్రపోతోంది

English Ghazal

I want to see beyond the moon, my God
I want to reach beyond the horizon, my God

A heart that sings and dances can’t be quiet
I want to play beyond the childhood, my God

Heartless victory never finds value
I want to win beyond the defeat, my God

If love is eternal how does it end?
I want the bliss beyond the desire, my God

Aim is not just to reach the heavens Iduri
I want to live beyond the death, my God

నా రుబాయి

ఈ మధ్య సామల సదాశివ మాస్టారు గురించి తెలుసుకున్నప్పుడు రుబాయిల గురించి కూడా తెలిసింది. చిన్న ప్రయత్నం చేశాను. పెద్దలు  చదివి సలహాలు ఇవ్వగలరు

చెలి పాద సవ్వడి అదిగో గుండె లయ సరిచూసుకో

రస రాణి నవ్వింది కసిగా వలపు వీణ శ్రుతిచేసుకో

తనతో గడిపిన అనుక్షణం ఒక సుందర కావ్యం

అపురూప మానస చిత్రం కుంచెతో నీ మదిగీసుకో

ఈడూరీ మరణంలోనూ ప్రేయసిని పెనవేసుకో

స్నేహితుల దినం

స్నేహితుడంటే “ఒంటరితనములోనూ వదలని తుంటరి” ఈ స్నేహితులదినం సందర్భంగా నా స్నేహితులందరికీ శుభాకాంక్షలతో...........

అమ్మ తిట్టినప్పుడు

నాన్న మొట్టినప్పుడు

అక్క కసిరినప్పుడు

అన్న బాదినప్పుడు

పాఠం తలకెక్కనప్పుడు

మాస్టారు కొట్టినప్పుడు

పక్కనోడు గిచ్చినప్పుడు

పరీక్షలో తప్పినప్పుడు

గోళీకాయలాడినప్పుడు

జామకాయలు కోసినప్పుడు

సినిమా టిక్కెట్టు దొరకనప్పుడు

శ్రీరామనవమి పండగప్పుడు

అమ్మాయి నచ్చినప్పుడు

ప్రేమలేఖ రాసినప్పుడు

కాలేజీ రోజులప్పుడు

పార్కుల్లో తిరిగినప్పుడు

ఉద్యోగం వచ్చినప్పుడు

తొలిజీతం అందినప్పుడు

భాద్యతలు పెరిగినప్పుడు

చేబదుళ్ళు అడిగినప్పుడు

వార్ధక్యం కమ్మినప్పుడు

వ్యాధులు వాటేసినప్పుడు

చీకట్లు ముసిరినప్పుడు

తుది శ్వాస వదిలినప్పుడు

నను వీడని ఓ నేస్తమా

నా నీడవు నువ్వే సుమా

నా జీవన సర్వస్వమా

నీకోసమొక దినం న్యాయమా????

సం(సారీ)!!!!

అనగనగా ఒక బ్రహ్మచారి
పాపం తప్పిపోయి దారి
పెళ్ళనే ఊబిలోకి జారి
అయ్యాడు కొత్త సంసారి!!


ఆ కయ్యాలమారి
తేలేదని కొత్త శారీ
అపర కాళిగా మారి
చేసింది వాడికి పిచికారీ!!


ఎముకలగూడుగా మారి
బతుకుపై విసిగి వేసారి
వేసుకున్నాడు చెట్టుకు ఉరి
చేరుకున్నాడు యమపురి!!


యమభటులు చుట్టూచేరి
నవ్వుతుంటే మరీ మరీ
చూపాడు భార్య ఫొటో ఒక్కసారి
పరుగెత్తారు అంతా తలో దారి!!!

ముళ్ళపూడి

ఎందరో వ్యక్తులు గుమిగూడి

అయ్యారేమో ఒక ముళ్ళపూడి

హాస్యానికి శ్రుష్టించారొక ఒరవడి

నవ్వాలంతా యుగాల తరబడి

వారి కధలు చదివితే  మనసుపడి

నవ్విస్తూనే పెట్టిస్తారు కంటతడి

స్నేహంలో బాపుగారికి సరిజోడి

ఇపుడా లోటును తీర్చే మనిషేడి?

మాకుంది

తాడో పేడో తేల్చుకునే ధైర్యం మాకుంది
విజయాలు దక్కించుకునే సైన్యం మాకుంది

కాలంచెల్లిన ముసలితరం పాలన మాకొద్దు
నవచైతన్యం నింపే యువతరం మాకుంధి

సర్వనాశనం చేసే అణుబాంబులు మాకొద్దు
సహనం గెలిపించే సత్యాగ్రహం మాకుంది

గారడీలు చేసే మూఢాచారం మాకొద్దు
నిజాల నిగ్గును తేల్చే విజ్ఞానం మాకుంది

అరుపులు కేకల అరువు సంగీతం మాకొద్దు
హ్రుదయం కదిలించె భావగీతం మాకుంది

అంతులేని రహస్యాల ఆకాశం మాకొద్దు
అన్నదాత నమ్ముకున్న పుడమితల్లి మాకుంది

ఈడూరీ, పెత్తనం చేసే పెద్దన్నలు మాకొద్దు  
సైనికులై నడిపించే నాయకత్వం మాకుంది