Monday, April 26, 2021

పేరడీ.....రడీ

 గోలీమార్ సినిమాలో మగాళ్ళు ఒట్టి మాయగాళ్ళె అన్న పాటకి నా పేరడీ.....రడీ  



వైరస్సు ఒట్టి మాయలాడే కరుణంటే ఏమిటో తెలీదే  

ప్రాణాలు తోడేసి పోతాదే కరోన అంటె  ఇంతే   


వైరస్సు ఒట్టి మాయలాడే కరుణంటే ఏమిటో తెలీదే  

ప్రాణాలు తోడేసి పోతాదే కరోన అంటె  ఇంతే   


రోజంతా పేషంటు దగ్గుతుంటే ఫ్లూలాగ టెంపరేచరున్నదంటే  

వైరస్సు నీకు సోకినట్టే....కరోన అంటె ఇంతే   


వైరస్సు ఒట్టి మాయలాడే కరుణంటే ఏమిటో తెలీదే  

ప్రాణాలు తోడేసి పోతాదే కరోన అంటె  ఇంతే  


ఢంకుటకర ఢంకుటకర ------------టా


కాసేపు మాస్కుతీసి తిరుగుతామ్ కూసంత గుంపులొ పడి దొర్లుతాం   

కాసేపు మాస్కుతీసి తిరుగుతామ్ కూసంత గుంపులొ పడి దొర్లుతాం 

వైరస్సు గాలేంటో మ్యూటేన్టో పేటెంటో యామో ఏంటో 

ముక్కులోకి వచ్చినిన్ను చేరదా నీ చెస్టు పిండి పిండి చేయదా   

మీరింక పైపైకే....కరోన అంటె ఇంతే   


వైరస్సు ఒట్టి మాయలాడే కరుణంటే ఏమిటో తెలీదే  

ప్రాణాలు తోడేసి పోతాదే కరోన అంటె  ఇంతే  


బతికుంటె బలుసాకు తింటువుంటాం ఇంటినుండె పనులన్ని చేసుకుంటామ్   

బతికుంటె బలుసాకు తింటువుంటాం ఇంటినుండె పనులన్ని చేసుకుంటామ్ 

టీవీల్లో న్యూసేంటొ గోలేంటో బాధేంటో యామో యాంటో  

అడ్డమైన వార్తలన్ని ఆపరా కూసింత మంచి కూడ చూపరా  

ఛానళ్ళు ఛీఛీ కరోన్ కూడ ఇంతే  


  



Sunday, April 18, 2021

 కరోనాను అడ్డుకోండి మనుషులార ఇపుడైనా

జాగ్రత్తగ మసలుకోండి మూర్ఖులార ఇపుడైనా


శవంపైన నగలుకూడ ఒలుచుకునే దుర్మార్గుడ

గుండెలోన మానవతను ఒంపుకోర ఇపుడైనా 


మందులన్ని మాయమాయె మార్కెట్లో ఎందుకనో

లాభాలను దండుకొనుట మానుకోర ఇపుడైనా


కార్పొ"రేటు" ఆస్పత్రులు మారాలోయ్ తప్పదిపుడు

బెడ్డుకొరకు బేరాలను వదులుకోర ఇపుడైనా


ప్రతిరోజూ తాగుతుంటె ఆరోగ్యం సంగతేంటి?

కుటుంబాన్ని ప్రేమతోటి చూసుకోర ఇపుడైనా


అధికారులు మొద్దునిద్ర వదులుకుంటె మంచిదండి

లంచమొదిలి మంచిపేరు అందుకోర ఇపుడైనా


స్నానాలకు తొందరేంటి నది ఎపుడూ దేవతేగ 

ప్రాణాలను చూసుకోండి భక్తులార ఇపుడైనా 


లక్షలాది జనులెందుకు ఎలక్షన్ల సభలెందుకు

ఓటర్లను బాధ్యతెరిగి నిలుపుకోర ఇపుడైనా


అభిమానులు లేకపోతె నటులెక్కడ ఈడూరీ

నిజజీవిత హీరోగా నిలబడరా ఇపుడైనా 


కరోనా కష్టకాలంలో కూడా మనుషులు చూపిస్తున్న వికృత చేష్టలు చూసి స్పందించి రాసిన ఘజల్ యిది. ఆడమనిషి చనిపోతే ఆవిడ ఒంటిపై వున్న నగలను దోచుకున్న ఆసుపత్రి సిబ్బంది గురించి విన్నాను. ఆసుపత్రిలో బెడ్ కోసం కరోనా పీడితుల కుటుంబాలు పడుతున్న యిబ్బందులను విన్నాను. ప్రజల క్షేమం ఏమీ పట్టనట్టుగా వ్యవహరిస్తున్న అధికారులూ, ఎవడి గోల వాడిదే అన్నట్టుగా తమ సినిమాలను ప్రమోట్ చెసుకోడానికి ఆయాసపడుతున్న నటులు, ప్రజలేమైతే మనకెందుకు మన నాటకాలు మనం ఆడదాం అనుకుని యధేచ్చగా సభలు పెట్టుకుంటున్న నాయకులూ, ఏ మాత్రం జాగ్రత్తలు పాటించకుండా స్నానాలు చేసి పుణ్యం పెంచుకోవాలనుకునే భక్తశిఖామణులూ అందరూ కాస్త సమ్యమనం పాటిస్తే మంచిది.    







Wednesday, March 10, 2021

శంకరా

 ఆకులతోటీ పూజలు చేస్తే ఆనందించే శంకరా

ఆర్తిగ పిలిచీ శరణనియంటే అభయములిచ్చే శంకరా 


చుక్క నీటితొ తడిపితె చాలూ నిండా మునిగే దేవుడవు

అడిగినవాడికి లేదనకుండా వరాలనిచ్చే శంకరా 


ఆదిభిక్షువే అయినా కూడా అందరి కడుపూ నింపెదవు

కోపంవస్తే కాముడినైనా బూదిగమార్చే శంకరా


అర్ధదేహమే అంబికకిచ్చీ నీవే సగమై మిగిలావు

మహిళకు మగనితొ సమానమయ్యే విలువలనిచ్చే శంకరా  


సాలీడైనా సామజమైనా ఒకటిగచూసే దేవరవు

వలువలకన్నా విలువలు మిన్నని చర్మం దాల్చే శంకరా


నీవేగనకా సరియనకుంటే చీమలు కూడా కుట్టవట

విపత్తులోనూ గమ్మత్తుజేసీ భక్తులబ్రోచే శంకరా


మంచుకొండలూ నీవేనంటా వల్లకాటిలో నీవేనటగా  

లయకారుడవని పేరేగానీ ఆయువునిచ్చే శంకరా 


ఆదియులేదూ అంతములేదూ ఎక్కడ వెదికిన నీవేగ 

ఎన్నో జన్మల పూజల ఫలమే నినుజూపించే శంకరా 


నాయకుడంటే నమ్మినవారికి మంచిని చేసే వాడు కద 

మాకై నిత్యము గళమున గరళము యింపుగ భరించె శంకరా

Friday, December 18, 2020

తమ్ముడూ....

 లోభికెపుడూ కలిమినిలవదు తెలుసుకోరా తమ్ముడూ 

అలసటంటే గెలుపు దక్కదు తెలుసుకోరా తమ్ముడూ


పెద్దలెన్నడు తప్పు చెప్పరు ఉదాసీనతె నష్టమూ  

శుచిగ వుంటే రోగమంటదు తెలుసుకోరా తమ్ముడూ   


పాడిపంటలు పుష్కలముగా వున్ననాడే పబ్బమూ

రైతులేకా కడుపునిండదు తెలుసుకోరా తమ్ముడూ 


చెట్టుచేమ జంతుజాలము వున్న పుడమే అందమూ

బీడు భూమిలొ మొక్క బతకదు తెలుసుకోరా తమ్ముడూ


పదవులెపుడూ పాములాటలు మానవత్వమె ధర్మమూ

శివుడు చెప్పక చీమకుట్టదు తెలుసుకోరా తమ్ముడూ


మిత్రులెవ్వరు శత్రువెవ్వరు వున్నదొకటే బంధమూ 

ఆత్మకన్నా చుట్టముండదు తెలుసుకోరా తమ్ముడూ  


మంచి పంచుతు పోతువుంటే మరణమవ్వదు భారమూ   

పుట్టినోడికి చావు తప్పదు తెలుసుకోరా తమ్ముడూ 

Wednesday, April 10, 2019

యిపుడైనా

ఒక్కసారి మనుషులుగా మారుదాము యిపుడైనా
స్వార్ధ రహిత మంచితనం పంచుదాము యిపుడైనా


బీద బిక్కి కులం మతం అంతరాలనొదిలేసీ
బానిసత్వ సంకెళ్లను తెంచుదాము యిపుడైనా


నాకొడుకూ నాకూతురు నాపెళ్లాం అని కాదోయ్
విశ్వమంత మనదేనని చాటుదాము యిపుడైనా


ఆయుధాలు ఎన్నున్నా ఆత్మశాంతి దొరికేనా
గొంతులెత్తి స్నేహగీతి పాడుదాము యిపుడైనా


మందిరాలు, మసీదులూ చర్చిలేల ఈడూరీ
మనసుల్లో దేవుడినే నిలుపుదాము యిపుడైనా


అహంకార సెగలతోటి రగులుతోంది భూగోళం 
రోజుకొక్క పూలమొక్క నాటుదాము యిపుడైనా

Monday, March 25, 2019

వున్నదోయి

అడవంతా అదేపనిగ తిరగాలని వున్నదోయి
మూగజీవులన్నిటినీ కలవాలని వున్నదోయి 


ఆచెట్టూ ఈకొమ్మా తడుముకుంటు రోజంతా
ఆకులోన ఆకునవుతు మసలాలని వున్నదోయి

 
కొండల్లో కోనల్లో తిరుగాడుతు లేడిలాగ
ఆకుపచ్చ తివాచిపై నడవాలని వున్నదోయి


జలపాతపు హోరులోని మాధుర్యం వినుకుంటూ
ప్రకృతిలో పరవసిస్తూ పాడాలని వున్నదోయి

 
వనమంటే వెన్నెలలే పగలైనా రేయైనా
మాలతిలో మనసంతా తడపాలని వున్నదోయి


తుమ్మెదనై ప్రతిపువ్వును పలకరిస్తు ఈడూరీ
ఆనందపు మధువులనే తాగాలని వున్నదోయి


ఈ అడవులు అంతరిస్తె మనుగడేది మనుషులకీ
వనదేవత మన తల్లని చాటాలని వున్నదోయి 



 



Wednesday, March 13, 2019

బతుకిట్టాగుండేదా

నుదుటన రాతలు తల్లులు రాస్తే మన బతుకిట్టాగుండేదా
తండ్రులు చూపిన దారిలో నడిస్తే మన బతుకిట్టాగుండేదా


అంతా మంచే వుంటే దేశం యింకో విధంగ ఉండేదే
గురువులు  జెప్పిన నీతులు ఫలిస్తే మనబతుకిట్టాగుండేదా


వారం తిరిగే లోపే జీతం మాయం, ఏమిటి ఖర్మం?
ఒకటో తేదీ రోజూ వస్తే మనబతుకిట్టాగుండేదా


రేపుంటామో లేదో తెలీదు ఎందుకులెద్దూ ఆరాటం
చావుపుట్టుకల వివరం తెలిస్తే మనబతుకిట్టాగుండేదా


పెళ్ళాం చేతికి డబ్బులు దొరికితే మనపని కాస్తా ఖాళీ
చొక్కా జేబుకు పాస్వర్డ్ తగిలిస్తే మనబతుకిట్టాగుండేదా

రంగులమయమే స్వప్నం ఎపుడూ...నిజమది కాదుర ఈడూరి  
కలలో చూసిన కన్యే వరిస్తే మనబతుకిట్టాగుండేదా


డబ్బును చూస్తే తోకలు వూపుట నేతలకెపుడూ అలవాటేలే
ప్రజలే వోటుకు విలువను యిస్తే మన బతుకిట్టాగుండేదా