కాముడివే

రాతిరేళ తనువంతా ప్రవహిస్తూ కాముడివే   
సరసమాడు వేళలలో అలరిస్తూ శ్యాముడివే

ఒంటరిగా నేనుంటే ఉబుసుపోక కూచుంటే    
ముద్దులాటపాటలలో మురిపిస్తూ బాలుడివే

తోడు నీడ ఔతానని పెళ్ళిలోన బాసచేసి 
కడదాకా ననునీతో నడిపిస్తూ దేవుడివే  

నిమిషమైన ఆడజాతి నిలువలేని లోకంలో
కంచుకవచమన్నట్టుగ రక్షిస్తూ ధీరుడివే

పైడి లేడి మోజు పడిన సీత నేను కాకుండా 
చుట్టుముట్టు కష్టాలను తొలగిస్తూ రాముడివే

అలుముకున్న చీకట్లను దాటించే చెలికాడా    
బతుకంతా వెన్నెలలే కురిపిస్తూ సోముడివే

దిష్టిచుక్క లేకుండా కుదరదుగా ఈడూరీ
ఈజన్మకు నామనసే దోచేస్తూ చోరుడివే

స్నేహితుడు

కష్టం వస్తే తోడుగ నిలిచే వాడే స్నేహితుడు 
కాటికి కూడా నీతో నడిచే వాడే స్నేహితుడు

నలుపూ తెలుపూ రంగులు ఎపుడూ ఒకటే కాకున్న 
బేధం మరచీ ఒకటిగ మెదిలే వాడే స్నేహితుడు 

ఎదలో ఎన్నో అలలే విసురుగ వలలే వేస్తున్న  
మనసుతొ నీపై మధువును చిలికే వాడే స్నేహితుడు

నీలో తననే చూస్తూ నిరతం నీతో రమిస్తూ 
శూన్యం లోనూ ప్రేమై కురిసే వాడే స్నేహితుడు

వందలు వేలూ మనుషులు ఎందుకు లేవోయ్ ఈడూరి 
అమాస నాడూ నీకై మెరిసే వాడే స్నేహితుడు

షుక్రియ

నీతో గడిపిన క్షణాలన్నిటికి షుక్రియ 
నాకే ఇచ్చిన సుఖాలన్నిటికి షుక్రియ 

దివిలో వెలసిన దేవత భువికే వచ్చీ   
నాపై కురిసిన వరాలన్నిటికి షుక్రియ

తెలుపగ తరమా చెలియా మదిలో భావం  
పదాలు అల్లిన కవితలన్నిటికి షుక్రియ

నుదుటన రాసిన రాతలు ఏమైనాయో
మనకై మారిన గీతలన్నిటికి షుక్రియ

ఒకరికి ఒకరై ఎపుడూ నిలవాలంటూ 
అక్షతలేసిన చేతులన్నిటికి షుక్రియ

రెక్కలు తొడిగిన ఊహల విజయ నివేదన    
పెదాలు పంచిన మధువులన్నిటికి షుక్రియ

కలిసిన తనువుల లక్ష్యము వెన్నెల గమనం  
సుధలే చిలికిన రాత్రులన్నిటికి షుక్రియ

అక్షరాలు

కాగితాల తోటలలో తిరగాలని ఉంది నాకు 
అక్షరాలు సున్నితంగ తాకాలని ఉంది నాకు 

జీవితాన నాన్నలాగ పాఠాలను నేర్పునట్టి
పుస్తకమే మస్తకమని పాడాలని ఉంది నాకు

సువాసనలు వెదజల్లగ ఎందుకోయి అత్తరులూ
గ్రంధాలే సుగంధాలు చాటాలని ఉంది నాకు

పారుతున్న ఏరులాగ సంస్కృతినే ప్రవహించే
పుస్కాలకు ఆనకట్ట కట్టాలని ఉంది నాకు

ఎవరికైన ఏకాంతం అంతులేని ఆవేదనె 
కితాబులే స్నేహితులని తెలపాలని ఉంది నాకు

ఈబుక్కూ తాళపత్రమేదైతేనేమిగాని
బుక్కులనే కానుకగా ఇవ్వాలని ఉంది నాకు 

గుండెలపై పుస్తకాన్ని పెట్టుకునీ ఈడూరీ
సంతసముగ ఊపిరులే వదలాలని ఉంది నాకు

జిందగీ

ఎన్నొ ఏళ్ళ మధ్యంలా ఊరిస్తోంది జిందగీ 
ఎదురింట్లో పిల్ల లాగ కవ్విస్తోంది జిందగీ

అందనిదే అందినట్టు అల్లరులే చేస్తుంటే   
ఎడారిలో ఎండమావి అనిపిస్తోంది జిందగీ 

కన్ను మూసి తెరుచు లోపు కనుమరుగౌ తారలాగ
మనసుతోటి దోబూచులె ఆడిస్తోంది జిందగీ

ఏ నిముషం ఏమగునో ఎవరికెరుక ఈజగతిలొ 
సంద్రంలో కెరటంలా పడిలేస్తోంది జిందగీ 

ఐదేళ్ళకు ఒక్కసారి అగుపించే నాయకుడా
అన్నట్టుగ ఒకోసారి మురిపిస్తోంది జిందగీ

తప్పొప్పులు అతిసహజం నాటకాలు జీవితాలు 
టీవీలలొ సీరియల్సు మరిపిస్తోంది జిందగీ  

అమాయకపు చేపపిల్ల నువ్వేనా ఈడూరీ 
నెమ్మదిగా ఎరవేసీ వలలేస్తోంది జిందగీ 

గోదావరి

నింగినుండి జారిపడ్డ మెరుపల్లే మెరుస్తోంది గోదారీ 
పుష్కరాల శోభలన్ని తనలోనే పరుస్తోంది గోదారీ   

కలకాలం కనులవిందు కలిగిస్తూ పాడిపంటలందిస్తూ
గోదావరి జిల్లాలకు తన ప్రేమే పంచుతోంది గోదారీ 
  
కొండలలో కోనలలో వాగులతో వంకలతో పదము కలిపి
చక్కనైన జానపదుల గీతాలను పాడుతోంది గోదారీ

ఎల్లెడలా పరుగులెడుతు ఆరుగాలమలరిస్తూ నీరిస్తూ   
రైతన్నల కంటి నీరు తనచేత్తో తుడుస్తోంది గోదారీ 

ఈడూరీ పాపికోండలొకవైపూ పంట చేలు ఒకవైపూ 
ప్రకృతియను పట్టు చీర కట్టుకునీ మురుస్తోందీ గోదారీ

వాన

నిన్ను మొదటిసరి చూసినప్పుడు
నా మీద పడిన వర్షపు చుక్క
నీ నుదుటి సింధూరంగా మారుతుందని 
ఆ క్షణాన నాకు తెలియదు

చేయీ చేయీ కలిపి
పార్కులూ సినిమాలూ అంటూ 
తిరిగినప్పుడు నీ నవ్వుల నుండి 
జారిన ముత్యాలు...చిరుజల్లులా
నన్ను ఆసాంతం తడిపేశాయి  

నెత్తిన జీలకర్రా, బెల్లం పెట్టిన వెంటనే
కురిసిన వాన 
భద్రాచల సీతారాముల కళ్యాణం
గుర్తు చేసింది కదూ!!!!!! 

ఆపై మన ప్రేమ సునామీకి
ఆ నాటి కుంభవృష్టే బినామీ


తొలిసంతానాన్ని చేతులలోకి 
తీసుకున్నప్పుడు పడ్డ తొలకరి
మనసులని కూడా తడిపేసింది

రైన్ రైన్ గో అవే అంటూ పిల్లలు
రైములు పాడుతుంటే మన నుండి ఎవరో
ఏదో లాగేసుకుంటున్న వేదన...

పిల్లలు పెరుగుతున్న కొద్దీ
ప్రతి రోజూ వరాల జల్లే 
అంతు చిక్కడం లేదు
ఇది ఏ మేఘ సందేశమో!!!!!!!!!!!!