అక్షరాలు

కాగితాల తోటలలో తిరగాలని ఉంది నాకు 
అక్షరాలు సున్నితంగ తాకాలని ఉంది నాకు 

జీవితాన నాన్నలాగ పాఠాలను నేర్పునట్టి
పుస్తకమే మస్తకమని పాడాలని ఉంది నాకు

సువాసనలు వెదజల్లగ ఎందుకోయి అత్తరులూ
గ్రంధాలే సుగంధాలు చాటాలని ఉంది నాకు

పారుతున్న ఏరులాగ సంస్కృతినే ప్రవహించే
పుస్కాలకు ఆనకట్ట కట్టాలని ఉంది నాకు

ఎవరికైన ఏకాంతం అంతులేని ఆవేదనె 
కితాబులే స్నేహితులని తెలపాలని ఉంది నాకు

ఈబుక్కూ తాళపత్రమేదైతేనేమిగాని
బుక్కులనే కానుకగా ఇవ్వాలని ఉంది నాకు 

గుండెలపై పుస్తకాన్ని పెట్టుకునీ ఈడూరీ
సంతసముగ ఊపిరులే వదలాలని ఉంది నాకు