తమ్ముడూ....

 లోభికెపుడూ కలిమినిలవదు తెలుసుకోరా తమ్ముడూ 

అలసటంటే గెలుపు దక్కదు తెలుసుకోరా తమ్ముడూ

పెద్దలెన్నడు తప్పు చెప్పరు ఉదాసీనతె నష్టమూ  

శుచిగ వుంటే రోగమంటదు తెలుసుకోరా తమ్ముడూ   

పాడిపంటలు పుష్కలముగా వున్ననాడే పబ్బమూ

రైతులేకా కడుపునిండదు తెలుసుకోరా తమ్ముడూ 

చెట్టుచేమ జంతుజాలము వున్న పుడమే అందమూ

బీడు భూమిలొ మొక్క బతకదు తెలుసుకోరా తమ్ముడూ

పదవులెపుడూ పాములాటలు మానవత్వమె ధర్మమూ

శివుడు చెప్పక చీమకుట్టదు తెలుసుకోరా తమ్ముడూ

మిత్రులెవ్వరు శత్రువెవ్వరు వున్నదొకటే బంధమూ 

ఆత్మకన్నా చుట్టముండదు తెలుసుకోరా తమ్ముడూ  

మంచి పంచుతు పోతువుంటే మరణమవ్వదు భారమూ   

పుట్టినోడికి చావు తప్పదు తెలుసుకోరా తమ్ముడూ 

యిపుడైనా

ఒక్కసారి మనుషులుగా మారుదాము యిపుడైనా

స్వార్ధ రహిత మంచితనం పంచుదాము యిపుడైనా

బీద బిక్కి కులం మతం అంతరాలనొదిలేసీ

బానిసత్వ సంకెళ్లను తెంచుదాము యిపుడైనా

నాకొడుకూ నాకూతురు నాపెళ్లాం అని కాదోయ్

విశ్వమంత మనదేనని చాటుదాము యిపుడైనా

ఆయుధాలు ఎన్నున్నా ఆత్మశాంతి దొరికేనా

గొంతులెత్తి స్నేహగీతి పాడుదాము యిపుడైనా

మందిరాలు, మసీదులూ చర్చిలేల ఈడూరీ

మనసుల్లో దేవుడినే నిలుపుదాము యిపుడైనా

అహంకార సెగలతోటి రగులుతోంది భూగోళం 

రోజుకొక్క పూలమొక్క నాటుదాము యిపుడైనా

వున్నదోయి

అడవంతా అదేపనిగ తిరగాలని వున్నదోయి
మూగజీవులన్నిటినీ కలవాలని వున్నదోయి 

ఆచెట్టూ ఈకొమ్మా తడుముకుంటు రోజంతా
ఆకులోన ఆకునవుతు మసలాలని వున్నదోయి
 
కొండల్లో కోనల్లో తిరుగాడుతు లేడిలాగ
ఆకుపచ్చ తివాచిపై నడవాలని వున్నదోయి

జలపాతపు హోరులోని మాధుర్యం వినుకుంటూ
ప్రకృతిలో పరవసిస్తూ పాడాలని వున్నదోయి
 
వనమంటే వెన్నెలలే పగలైనా రేయైనా
మాలతిలో మనసంతా తడపాలని వున్నదోయి

తుమ్మెదనై ప్రతిపువ్వును పలకరిస్తు ఈడూరీ
ఆనందపు మధువులనే తాగాలని వున్నదోయి

ఈ అడవులు అంతరిస్తె మనుగడేది మనుషులకీ
వనదేవత మన తల్లని చాటాలని వున్నదోయి 


 

బతుకిట్టాగుండేదా

నుదుటన రాతలు తల్లులు రాస్తే మన బతుకిట్టాగుండేదా
తండ్రులు చూపిన దారిలో నడిస్తే మన బతుకిట్టాగుండేదా

అంతా మంచే వుంటే దేశం యింకో విధంగ ఉండేదే
గురువులు  జెప్పిన నీతులు ఫలిస్తే మనబతుకిట్టాగుండేదా

వారం తిరిగే లోపే జీతం మాయం, ఏమిటి ఖర్మం?
ఒకటో తేదీ రోజూ వస్తే మనబతుకిట్టాగుండేదా

రేపుంటామో లేదో తెలీదు ఎందుకులెద్దూ ఆరాటం
చావుపుట్టుకల వివరం తెలిస్తే మనబతుకిట్టాగుండేదా

పెళ్ళాం చేతికి డబ్బులు దొరికితే మనపని కాస్తా ఖాళీ
చొక్కా జేబుకు పాస్వర్డ్ తగిలిస్తే మనబతుకిట్టాగుండేదా

రంగులమయమే స్వప్నం ఎపుడూ...నిజమది కాదుర ఈడూరి  
కలలో చూసిన కన్యే వరిస్తే మనబతుకిట్టాగుండేదా

డబ్బును చూస్తే తోకలు వూపుట నేతలకెపుడూ అలవాటేలే
ప్రజలే వోటుకు విలువను యిస్తే మన బతుకిట్టాగుండేదా

అనుకున్నా!

పదునాలుగు లోకాలూ దిగివచ్చావనుకున్నా
నాకోసం స్వర్గాన్నే వదిలొచ్చావనుకున్నా

సోయగాల రారాణివి, సాటిలేరు నీకెవరూ
ఐశ్వర్యకు అందాన్నే అరువిచ్చావనుకున్నా

మత్తెక్కిన కళ్ళతోటి నావైపుకు నువు చూస్తే
శతాబ్దాల క్రితంనాటి మధువిచ్చావనుకున్నా

వెన్నెల్లో శిల్పంలా నా ఎదురుగ నుంచుంటే
కలలలోన తేలేందుకు కదిలొచ్చావనుకున్నా

నువురాసిన ప్రేమలేఖ అందిందోయ్ ఈడూరికి
రాబోయే జన్మలనూ రాసిచ్చావనుకున్నా

నినుచూస్తే

కనులముందు కార్తీకం కనబడింది నినుచూస్తే
కొండగాలి ఊసేదో వినబడింది నినుచూస్తే

ఆ వయారి నడకలతో అలరించే నీ అందం
నర్తించే మయూరమే తడబడింది నినుచూస్తే

కన్నులతో నువు చేసే అల్లరులే అద్భుతాలు
నాకంటికి నిదురైతే కొరవడింది నినుచూస్తే 

ఏ దివిలో దీపానివొ భువిమీదకు దిగినావే
ఈడూరికి జోడేనని ధృవపడింది నినుచూస్తే  

నీ చూపే తగిలిందో...మన్మధుడే వదిలాడో
గుండెలోన బాణమేదొ దిగబడింది నినుచూస్తే 

దేనికిరా??

అటో ఇటో దూకకుంటె గోడున్నది దేనికిరా 
కన్నొ గిన్నొ కొట్టకుంటె ఈడున్నది దేనికిరా  

ఆకలైతె అడుక్కోడ రాజైనా పేదైనా    
కలో గంజొ తాగకుంటె కడుపున్నది దేనికిరా

మంచి చెడూ చెప్పకుంటె మానవతకు మనుగడేది 
మాటొ పాటొ రాయకుంటె కలమున్నది దేనికిరా

ఇతరులతో పంచుకొనుట చెట్టుకన్న ఎవరికెఱుక
కాయొ పండొ ఇవ్వకుంటె తరువున్నది దేనికిరా 

మత్తులోన మునిగితేనె గమ్మత్తుగ నుండునంట
పెగ్గొ మగ్గొ లేపకుంటె నోరున్నది దేనికిరా 

కరెన్సీల కట్టలెపుడు అవసరమే ఈడూరీ
అప్పొ సోప్పొ  చేయకుంటె డబ్బున్నది దేనికిరా

ప్రతీ శిలనూ శిల్పంగా మలచలేవు మిత్రమా  
రాయొ రప్పొ తెలియకుంటె మెదడున్నది దేనికిరా