దేనికిరా??

అటో ఇటో దూకకుంటె గోడున్నది దేనికిరా 
కన్నొ గిన్నొ కొట్టకుంటె ఈడున్నది దేనికిరా  

ఆకలైతె అడుక్కోడ రాజైనా పేదైనా    
కలో గంజొ తాగకుంటె కడుపున్నది దేనికిరా

మంచి చెడూ చెప్పకుంటె మానవతకు మనుగడేది 
మాటొ పాటొ రాయకుంటె కలమున్నది దేనికిరా

ఇతరులతో పంచుకొనుట చెట్టుకన్న ఎవరికెఱుక
కాయొ పండొ ఇవ్వకుంటె తరువున్నది దేనికిరా 

మత్తులోన మునిగితేనె గమ్మత్తుగ నుండునంట
పెగ్గొ మగ్గొ లేపకుంటె నోరున్నది దేనికిరా 

కరెన్సీల కట్టలెపుడు అవసరమే ఈడూరీ
అప్పొ సోప్పొ  చేయకుంటె డబ్బున్నది దేనికిరా

ప్రతీ శిలనూ శిల్పంగా మలచలేవు మిత్రమా  
రాయొ రప్పొ తెలియకుంటె మెదడున్నది దేనికిరా