భార్యామణి

నన్నుకొట్టి నువ్వెందుకు నవ్వుతావె భార్యామణి
కయ్యానికి కాలెందుకు దువ్వుతావె భార్యామణి

చిలికిచిలికి గాలివాన చెయ్యబోకు ప్రతివిషయం 
కాలకూట విషమెందుకు చిమ్ముతావె భార్యామణి

తప్పునాది కాదన్నది తెలిసికూడ వాదిస్తావ్ 
నేతిబీర నెయ్యినెలా అమ్ముతావె భార్యామణి

మొదటిషోకి మొదలెడితే నైటుషోకి తెములుతావు
అద్దానికి నీళ్ళనెపుడు వదులుతావె భార్యామణి

అనుష్కతో పోలిస్తే పనిపిల్లకి అప్పిస్తావ్   
అందగత్తెవంటెచాలు పొంగుతావె భార్యామణి 

హిట్లరునే మరపిస్తూ నియమాలను నిలుపుతావు
కారాలను మిరియాలను నూరుతావె భార్యామణి  

అందంగా తయారయ్యి అటువైపుకి తిరుగుతావు 
ఆశపెట్టి నీళ్ళుజల్లి కులుకుతావె భార్యామణి