గుర్తుందా

బడికిదారి చూపినట్టి కాలిబాట గుర్తుందా
చింతచెట్టు నీడలొన గోళీలాట గుర్తుందా 

పడిలేస్తూ ఎగబాకుతు కొండమీదికెక్కి మరీ 
పరవశాన చూసినట్టి రాతికోట గుర్తుందా 

వాగులోన ఆడుకుంటు డస్సిపోయి దప్పికయ్యి
యిసుకలోన తవ్వుకున్న చెలమ ఊట గుర్తుందా

మంటచూసి కొరివిదయ్యమనుకుంటూ భయపడ్డాం
ఊరిబయట కాలుతోన్న చెరుకుతోట గుర్తుందా 

నీవులేక నేను లేను అనుకుంటూ ఒకరినొకరు
హత్తుకుంటు పాడుకున్న చెలిమిపాట గుర్తుందా

క్లాసులోని రెండుజెళ్ళ సీత కన్ను కొట్టిందని
ఉబుసుపోక చెప్పుకున్న గాలిమాట గుర్తుందా

సినిమాకై పడిగాపులు ఆనందమె ఈడూరికి
మొదటి ఆట టికెట్టుకై తోపులాట గుర్తుందా