తప్పేం కాదోయ్

అడపా దడపా అల్లరి చేయుట తప్పేం కాదోయ్
నీలో బాలుని బయటికి లాగుట తప్పేం కాదోయ్    

దైవం కన్నులు ఇచ్చినదెందుకు చూచుటకేగా 
అందం చూసీ లొట్టలు వేయుట తప్పేం కాదోయ్  

నిత్యం సైనిక పాలన అంటే కష్టం కాదా
నియమం సంకెల నిలువున తెంచుట తప్పేం కాదోయ్ 

పెద్దలు మాత్రం పిల్లలు కారా సరదాకైనా
పుల్లల ఐసును ఫుల్లుగ చీకుట తప్పేం కాదోయ్

సినిమాకెడితే చేతులు ముడుచుకు కూచుంటారా
ఐటెం సాంగుకు ఈలలు కొట్టుట తప్పేం కాదోయ్ 

బోడిగ గుండును చూస్తూ ఊరికె వదిలెయగలమా 
టోపీ లాగీ ఒక్కటి మొట్టుట తప్పేం కాదోయ్ 

నిజాలు పలికిన రాజుకి దక్కెను స్మశాన వాటిక
అవసరానికో అబధ్ధమాడుట తప్పేం కాదోయ్