ఉంటుంది

ఎదుట నిలిచి నవ్వుతుంటె అమ్మలాగ ఉంటుంది
చీర కట్టుకున్న బాపు బొమ్మలాగ ఉంటుంది

ఆ అందం ఆ రూపం ఏమంటూ పొగడాలి
కాళిదాసు కవితలున్న కమ్మలాగ ఉంటుంది

నూలు చీర పట్టు చీర ఏదైనా ఏముంది
విరబూసిన మల్లెపూల కొమ్మలాగ ఉంటుంది

సిగ్గులతో నునుపెక్కిన చెక్కిలిదే సోయగము
మంచు పడ్డ గులాబీల రెమ్మలాగ ఉంటుంది

సౌందర్యం చిరునామా ఈడూరికి దొరికింది
సొగసులో అప్సరల జేజమ్మలాగ ఉంటుంది