వేసవి మంచిదే

మధ్యాహ్నం మామిడికాయ పప్పు

సాయంత్రం తియ్యటి మామిడి పండు

రాత్రి మూరెడు మల్లెపూలు

వేసవి మంచిదే!

సీతమ్మ

అడవికి రమ్మన్నా
దుంపలు తినమన్నా
అగ్గిలో దూకమన్నా
ఆఖరికి పొమ్మన్నా
అంగీకరించింది
సీతమ్మ
అది పతివ్రత
లక్షణమంది
నాటి బామ్మ
పురుషాహంకారమంది
నేటి భామ

అన్నా హజారే

బాపూ తెచ్చిన స్వాతంత్ర్యం చేజారె
అడుగో వచ్చె అన్నా హజారే
గర్జిస్తే ఈ ప్రజస్వామ్య పూజారే
లంచగొండ్ల గుండెలిక బేజారే

ఉగాది అంటే??

మాలిన్యమనే కుబుసం విడిచి
మనిషి తనమనే మరో చొక్కా తొడిగి
నవరసాల్ని షడ్రుచులుగా చేసిన పచ్చడి తిని
నవ వసంతాన్ని ఆహ్వానించడమే ఉగాది!!

కాల గమనం

ఒక మంచం మీద మల్లెపూవు నలుగుతోంది
మరో చోట ఓ తల్లిపేగు తెగుతోంది
ఇంకొచోట సగం చచ్చిన శవం మూలుగుతోంది
భూమి తన చుట్టూ తను తిరుగుతోంది

ఎందుకో నాకు

కళ్ళెదుటే  నువ్వున్నా కలలెందుకో నాకు
నీ తోడుగా వుంటున్నా కలతెందుకో నాకు

ఎన్నిసార్లు ఆ పెదవుల మధువులు నే తాగినా
వదల్లేదు తొలిముద్దు మత్తెందుకో నాకు

మల్లెపూల సువాసన మనసుని చుట్టేస్తున్నా
పాలుపోదు నువ్వులేని పక్కెందుకో నాకు
 
నా చుట్టూ ఎంతమంది తిరుగుతు వున్నా
ఊసుపోదు నువ్వులేక పొద్దెందుకో నాకు

అమృతాన్ని  కురిపించే నీ ప్రేమను చూస్తుంటే 
మెరుస్తుంది కళ్ళముందు అమ్మెందుకో నాకు

ఈడూరికి తోదుగా నూరేళ్ళూ నువ్వుంటే
వీడిపోదు బతుకు మీద ఆశెందుకో నాకు

అటో ఇటో

ప్చ్! ఏం మనిషో ఏమిటో
అడ్డు అదుపూ లేకుండా వెళిపోతున్నాడు ఎటో
అదిగో ఎదురుగా వస్తోంది ఆటో
ఇక తేలుతుంది వీడు అటో ఇటో