నే తాగితే తప్పేంటి..........?

ఇచ్చిన ప్రతి ఆర్డర్ క్షణంలో నా ముందుకి వచ్చేస్తుంటే 

ఏ సినిమా హీరోయినో ఊహల్లో కలిసి చిందేస్తుంటే

చికెన్ పకోడి అమ్మే చిన్నది ఓరకంట నన్నే చూస్తుంటే  

తలకెక్కిన కిక్కు రోజంతా కార్చిన చెమటను తుడుస్తుంటే 

నే తాగితే తప్పేంటి..........?

నా చుట్టూ స్వర్గం ఆవరిస్తూంటే

నా బాధలు సకలం ఆవిరౌతుంటే

నా పెళ్ళం రంభలా అనిపిస్తుంటే

నా పిల్లలు దేవదూతల్లా కనిపిస్తుంటే

నే తాగితే తప్పేంటి..........?

కష్టాల కడలిని ఇష్టాల ఊయలగా మారుస్తుంటే

అంతుచిక్కని వేదనని ఆనందం కప్పేస్తుంటే

భారీగా మారిన బతుకును ఈజీగా మరిపిస్తుంటే

వురేసుకున్నా దొరకని చావును నా ముంగిట నిలబెడుతుంటే

నే తాగితే తప్పేంటి....అవును నే తాగితే తప్పేంటి..........?

కొత్త కవి

ఏంటోయ్ కొత్త కవీ

రాస్తున్నావ్ అవీ ఇవీ

నీ రాతలు ప్రవహించాలి

యువరక్తం వుడికించాలి

శ్రీశ్రీని బట్టీ పట్టినా

సినారేని చుట్టుముట్టినా

అక్షరం అందలమెక్కదు

నీ లక్ష్యం నెరవేరదు

బూతు బొమ్మకు చొంగ కార్చే

యూతు నడక మార్చాలి 

పబ్బుల్లో పడి తాగిన

పది బీర్లూ కక్కించాలి

హాబీగా ప్రేమించే

బేబీలను మార్చాలి

బాయిఫ్రెండు కల్చరెంత

బ్యాడు ట్రెండో తెలపాలి

అడ్డంగా దండుకున్న

ఉద్దండుల తల వంచాలి

గలీజు గనుల గజనీలను

వురికంబం ఎక్కించాలి

నీ కలం నినదించాలి

వ్యవస్తను ఎదిరించాలి

యువతను రగిలించాలి

భవితను బతికించాలి

అంకురం

గాఢాంధకారంలో జగత్తు

గాఢ నిద్రలో నేను

ఇంతలో ఏదో అలజడి

ఒక స్త్రీ మూర్తి రోదన

నేను ఏదో ద్రవంలో

తేలుతున్న భావన 

నెమ్మదిగా కిందికి జారుతున్నా

అలా మొద్లైంది

నా తొలి ప్రయాణం 

అంతలోనే ఏదొ అడ్డంకి

స్త్రీ మూర్తి ఊపిరి బిగించింది

నన్ను ఏదో శక్తి బయటికి నెట్టింది

నాకు భయంతో ఏడుపొచ్చింది

అక్కడున్న అందరికీ నవ్వొచ్చింది

మగ బిడ్డ అన్న మాట వినిపించింది

సరిగ్గా అప్పుడే....

పురుషాహంకారం అంకురించింది    

వేసవి మంచిదే

మధ్యాహ్నం మామిడికాయ పప్పు

సాయంత్రం తియ్యటి మామిడి పండు

రాత్రి మూరెడు మల్లెపూలు

వేసవి మంచిదే!

సీతమ్మ

అడవికి రమ్మన్నా
దుంపలు తినమన్నా
అగ్గిలో దూకమన్నా
ఆఖరికి పొమ్మన్నా
అంగీకరించింది
సీతమ్మ
అది పతివ్రత
లక్షణమంది
నాటి బామ్మ
పురుషాహంకారమంది
నేటి భామ

అన్నా హజారే

బాపూ తెచ్చిన స్వాతంత్ర్యం చేజారె
అడుగో వచ్చె అన్నా హజారే
గర్జిస్తే ఈ ప్రజస్వామ్య పూజారే
లంచగొండ్ల గుండెలిక బేజారే

ఉగాది అంటే??

మాలిన్యమనే కుబుసం విడిచి
మనిషి తనమనే మరో చొక్కా తొడిగి
నవరసాల్ని షడ్రుచులుగా చేసిన పచ్చడి తిని
నవ వసంతాన్ని ఆహ్వానించడమే ఉగాది!!