నీ నవ్వులొ

మంచులోన తడిసినట్టి మల్లెపూవు కనబడింది నీ నవ్వులొ 
పైరగాలి పాడినట్టి రాగమేదొ వినబడింది నీ నవ్వులొ

పున్నమిలో చంద్రికలా నేలమీద విరబూసెను దరహాసము
ఓర్వలేని చందమామ అదేపనిగ తడబడింది నీ నవ్వులొ

బాపుగారు మనసుపడీ గీసుకున్న బొమ్మవేమొ అనుకున్నా 
కుంచెజారి వయ్యారం ఆందంగా అగుపడింది నీనవ్వులొ

పురివిప్పిన నెమలిలాగ సొంపులనే పరుచుకున్న పలువరుసలు 
నెమలినాట్యమందమనే వాదనకే తెరపడింది నీ నవ్వులొ

ఎందుకిలా కరుణించెనొ బాణమేసి మన్మధుడే ఈడూరిని 
ఈజన్మకి నామనసే మురిపెంగా ముడిపడింది నీ నవ్వులొ