ఎంత హాయి!!

 పున్నమిలో బ్రతుకంతా గడిపేస్తే ఎంత హాయి
వెన్నెల్లో ఊరంతా తిరిగొస్తే ఎంత హాయి  

ఆ చెరువులు, ఈ చెట్లూ మన ఊరికి మైలురాళ్ళు   
పచ్చదనపు తివాచీలు పరిచేస్తే ఎంత హాయి 

మారేడుగ మారిపోయి మా రేడుని కొలవాలీ 
తనువంతా శివపూజకు అర్పిస్తే ఎంత హాయి 

సృష్టిలోని ప్రతి పత్రం దైవానికి సమ్మతమే 
ఆకులతో ఆ దేవుని అర్చిస్తే ఎంత హాయి  

ఉత్సవాలు జాతరలూ అందరినీ కలపాలీ    
పండుగలకి ఊరంతా కలిసొస్తే ఎంత హాయి 

పక్కవాణ్ణి ద్వేషించుట మానేసీ మనమంతా
దుర్గుణాలు దూరంగా విసిరేస్తే ఎంత హాయి 

మనిషిలోనె ఉన్నాడుగ అనాదిగా మాధవుడూ 
ప్రతివాడూ ఈవిషయం గుర్తిస్తే ఎంత హాయి   

కల్తీలకు బలైపోయె మనబతుకులు అనునిత్యం 
స్వచ్చమైన ఆరోజులు మళ్ళొస్తే ఎంత హాయి  
  
పల్లెటూళ్ళ అందమేది పట్నంలో ఈడూరీ 
ఆ సొగసులు ఇటుకూడా రప్పిస్తే ఎంత హాయి