సిని-మాయే

చిటికెలు వేస్తే సుమోలు లేస్తే అది సినిమాయే 
ఒకటే గుండుకి నలుగురు ఛస్తే అది సినిమాయే 

రౌడీ గాడిని హీరో గారూ ఒకటే దెబ్బతొ     
పాతాళంలోనికి పాతేస్తే అది సినిమాయే 

బాల్యంలోనే ఎపుడొ తిరునాళ్ళలొ తప్పిపోయిన
అన్న తమ్ముడు మళ్ళీ కలిస్తే అది సినిమాయే 

పూటకు గడవని కూలీ నాలీ చేయని వాడిని
డబ్బున్నోళ్ళ పిల్ల ప్రేమిస్తే అది సినిమాయే

అమలాపురములో అమ్మాయి గారు ఉన్నట్టుండి    
అమెరికాలోన డ్యాన్సే చేస్తే  అది సినిమాయే

విదేశాలలో పెరిగిన హీరో ఇండియాకొచ్చి
ఎకరాలెకరాలుగ పండిస్తే  అది సినిమాయే   

ఈడూరీ ఇక లాభంలేదూ నువ్వూ నేనూ
తోచిందేదో తీసిపారేస్తే అది సినిమాయే