చాలు

అమ్మాయికి ఒక్క నవ్వు యిస్తే చాలు
ఓరకంట ఒక్క చూపు చూస్తే చాలు

పొద్దంతా చెప్పేందుకు ఏముంటాయి? 
రోజుకొక్క ప్రేమలేఖ రాస్తే చాలు

బంగారం, వెండిలోనె వుందా విలువ?
వాలుజడకు మల్లెపూలు తెస్తే చాలు

మహారాణి లాగ తనను చూడాలేంటి?
నీ ఎదపై తన బొమ్మను గీస్తే చాలు

అందమైన సమాధులే కట్టవద్దులె
నీ ఒడిలో తను కన్నులు మూస్తే చాలు

దినమంతా పనులేనా తప్పు సోదర 
ఒక్క క్షణం తనకోసం దాస్తే చాలు

వనితలేమి కోరుకొందురింతకుమించి
తన మోమున నీ నవ్వులు పూస్తే చాలు 

ఉంటాయి

నడిరాతిరి నీ కురులే గుర్తొస్తూ వుంటాయి
గిలిగింతలు సువాసనలు గుప్పిస్తూ వుంటాయి

నడకలెలా తెలిసాయో నాట్యమెలా నేర్చాయొ
నా ఎదపై అందంగా నర్తిస్తూ వుంటాయి

అమాసలో జాబిలమ్మ మెరిసిందా అన్నట్టు
నీ ముఖమూ ముంగురులూ మురిపిస్తూ వుంటాయి

వలపువాన కురిపించే మేఘమాలలే కురులు
రసపట్టుకు రారమ్మని కవ్విస్తూ వుంటాయి

నిదురలోకి జారనీవు మెళకువతొ వుండనీవు
ఈడూరికి మత్తేదో ఎక్కిస్తూ వుంటాయి

మతమంటే

ప్రతిమనిషీ తెలుసుకోక తప్పదులే మతమంటే
మానవతను నిలువెత్తున కప్పదులే మతమంటే

ప్రేమించుటె ఆరాధన దయాగుణం నైవేద్యం
ఆయుధాలు పట్టమనీ చెప్పదులే మతమంటే

కులాలతో అడ్డుగోడ కట్టువాడు స్వార్ధజీవి
ఎవ్వరినీ చెడుదారికి తిప్పదులే మతమంటే

మానవుడే సంఘజీవి సమానతే ఆదర్శం
చిన్న పెద్ద తేడాలను ఒప్పదులే మతమంటే

తేలికగా వీలుకాదు తెలుసుకొనుట ఈడూరీ
నమ్మకుంటె తనగుట్టును విప్పదులే మతమంటే

నా మొగుడు

ఎవరెస్టెక్కి జెండా పాతుట మరిచొస్తాడే నా మొగుడు
బజారుకెళ్ళి సరుకుల సంచీ వదిలొస్తాడే నా మొగుడు

సూటిగ చెబితె అర్థంకాదు హాస్యం అసలు బుర్రకెక్కదు
సినిమాకెడితే సీనుసీనుకి విసిగిస్తాడే నా మొగుడు

వివరంలేదు విషయంలేదు మెదడుకి పదును మచ్చుకి లేదు
డిస్కోకెళ్ళీ భరత నాట్యం చేసొస్తాడే నా మొగుడు

వంటకి వారు ముందుకు రారు తిండికి సారు దూరం కారు
సాంబార్లోకీ సగ్గుబియ్యము పోపేస్తాడే నా మొగుడు

బానెడు పొట్ట, జానెడు పొడుగు ఆటలలోన అడుగే పడదు
క్రికెట్ బంతితో టెన్నిసాటే ఆడేస్తాడే నా మొగుడు

నీగురించి

ట్విట్టరులో ట్వీటులెన్నొ పెట్టానే నీగురించి 
ఫేస్బుక్లో లైకులెన్నొ కొట్టానే నీగురించి  

అందమైన నీఫొటోలు పదికాలాలుండేలా
ఇన్స్టాగ్రాం మెమొరీలో దాచానే నీగురించి
  
రాసుకున్న లేఖలన్ని చేయిజారి పోకుండా
వాట్సాప్లో మెసేజులే చేశానే నీగురించి

కమ్మనైన కబురులెన్నొ చెబుతావని ఆశించీ 
హ్యాంగౌట్లో ఎదురుచూపు చూశానే నీగురించి

ఈడూరిని హీరోగా చిత్రిస్తూ కథలనల్లి
వైబరులో వైభవంగ పేర్చానే నీగురించి

నీ తలపు

ఉదయం తాగిన కాఫీ రుచిలా హాయిగ వుందే నీ తలపు
మల్లెల వాసన తాకిన మదిలా మత్తుగ వుందే నీ తలపు

ఘడియే యుగముగ గడిపెను చూడూ విరహం వీడని నా మనసు   
తొలకరి జల్లుల చిరువాసనలా చిక్కగ వుందే నీ తలపు

ఎపుడూ చూడని ఏవో రంగులు విరిసెను నాలో ఈనాడు 
నింగిలొ మెరిసిన తారక లాగా తళుకుగ వుందే నీ తలపు

అందాలన్నీ ఒకటై చేసే అల్లరి నాట్యం నీ నడక 
అపుడే విరిసిన తామరలాగా సొంపుగ వుందే నీ తలపు

నీవే ఎపుడూ పక్కన వుంటే చిరంజీవి కద ఈడూరి   
చేదే తగలని వైద్యంలాగా తీయగ వుందే నీ తలపు

సంక్రాంతి

గాదెలలోన కొత్త పంటలు
వీధుల్లోన భోగిమంటలు
ముగ్గులు వేసే ముద్దుగుమ్మలు
ఆశగ చూసే అల్లరి మూకలు
నులివెచ్చగ తాకే భానుని కిరణాలు
గుమ్మాలకి వేలాడే మామిడి తోరణాలు
విరివిగ పూసే బంతులు చేమంతులు
గొబ్బిళ్ళతొ ఆడే చక్కని పూబంతులు
ఊరంతా వినపడేలా హరిదాసు కీర్తనలు
ఇల్లిల్లూ తిరుగుతూ బసవన్నల నర్తనలు
ఆకాశాన పతంగుల హరివిల్లు
ఘుమఘుమలతో నిండిన వంటిల్లు
తొడలు కొట్టే పందెం రాయుళ్ళు
తలలు తెగి పడే మూగ కోళ్ళు
పరమాన్నాలూ బూరెలు అరిసెలు
ఆనందంతో విరిసే మనసులు
అత్తారింటికి దారేదంటూ 
గూటికి చేరే అల్లుళ్ళు
బావా బావా పన్నీరంటూ 
ఆటాడించే మరదళ్ళు
విందువినోదాల క్రాంతి
వాడవాడలా సంక్రాంతి