Friday, March 2, 2018

మది

సోషలు మీడియ చూరుని పట్టుకు గడిపేయాలంటోంది మది
ఛాటింగులతో డేటింగులతో సడి చేయాలంటోంది మది

రామూగాడు సోమూగాడు ఎపుడూ వుండే దోస్తులె కదా  
చెలి కొరకయితే ఏ చెలిమయినా వదిలేయాలంటోంది మది

మన్మధుడేనా వలపు శరాలు వదిలే వీరుడు లోకంలో 
చెలి గుండెలు తాకే బాణం గురి పెట్టేయాలంటోంది మది 

అలెక్జాండరు చెంఘీజ్ ఖానూ గెలిచేవారా ప్రతి యుద్ధం 
ఫెయిలయిపోతే సప్లీలోనూ ట్రై చేయాలంటోంది మది  

ఒకటే బాణం ఒకతే పెళ్ళం అన్నావంటె కష్టం రా    
బ్యాకప్ గట్టిగ చూసుకుని మరీ బతికేయాలంటోంది మది

ఆనందం

చిట్టిపొట్టి పాపలతో ఆడుతుంటె ఆనందం
ఆటలోని మాధుర్యం పంచుకుంటె ఆనందం

బుజ్జిబుజ్జి చేతులతో బువ్వ పెడితె తినాలోయ్
కమ్మనైన ఆ రుచులను గ్రోలుతుంటె ఆనందం

కాగితాల పడవల్లో చోటుందా కనుక్కో
వాననీటి దారులెంట సాగుతుంటె ఆనందం

అమ్మకడుపు చల్లగంటు దీవిస్తే ధన్యుడవే
తల్లిలాగే నీకు లాల పోస్తుంటే ఆనందం

తండ్రిలాగ దండిస్తే తప్పదంటు భరించాలి
సుతిమెత్తని కాఠిన్యం పొందుతుంటె ఆనందం

పాఠాలే చెబుతుంటే శ్రద్దపెట్టి నేర్చుకో
పంతుళ్లను నీ ఎదురుగ నిలుపుతుంటె ఆనందం

అదృష్టం వెతుక్కుంటు వచ్చిందోయ్ ఈడూరీ
నీబాల్యం ఇంటితలుపు తడుతుంటే ఆనందం

Monday, October 2, 2017

చాలు

అమ్మాయికి ఒక్క నవ్వు యిస్తే చాలు
ఓరకంట ఒక్క చూపు చూస్తే చాలు

పొద్దంతా చెప్పేందుకు ఏముంటాయి? 
రోజుకొక్క ప్రేమలేఖ రాస్తే చాలు

బంగారం, వెండిలోనె వుందా విలువ?
వాలుజడకు మల్లెపూలు తెస్తే చాలు

మహారాణి లాగ తనను చూడాలేంటి?
నీ ఎదపై తన బొమ్మను గీస్తే చాలు

అందమైన సమాధులే కట్టవద్దులె
నీ ఒడిలో తను కన్నులు మూస్తే చాలు

దినమంతా పనులేనా తప్పు సోదర 
ఒక్క క్షణం తనకోసం దాస్తే చాలు

వనితలేమి కోరుకొందురింతకుమించి
తన మోమున నీ నవ్వులు పూస్తే చాలు 

Saturday, August 12, 2017

ఉంటాయి

నడిరాతిరి నీ కురులే గుర్తొస్తూ వుంటాయి
గిలిగింతలు సువాసనలు గుప్పిస్తూ వుంటాయి


నడకలెలా తెలిసాయో నాట్యమెలా నేర్చాయొ
నా ఎదపై అందంగా నర్తిస్తూ వుంటాయి


అమాసలో జాబిలమ్మ మెరిసిందా అన్నట్టు
నీ ముఖమూ ముంగురులూ మురిపిస్తూ వుంటాయి


వలపువాన కురిపించే మేఘమాలలే కురులు
రసపట్టుకు రారమ్మని కవ్విస్తూ వుంటాయి


నిదురలోకి జారనీవు మెళకువతొ వుండనీవు
ఈడూరికి మత్తేదో ఎక్కిస్తూ వుంటాయి

Sunday, July 23, 2017

మతమంటే


ప్రతిమనిషీ తెలుసుకోక తప్పదులే మతమంటే
మానవతను నిలువెత్తున కప్పదులే మతమంటే

ప్రేమించుటె ఆరాధన దయాగుణం నైవేద్యం
ఆయుధాలు పట్టమనీ చెప్పదులే మతమంటే

కులాలతో అడ్డుగోడ కట్టువాడు స్వార్ధజీవి
ఎవ్వరినీ చెడుదారికి తిప్పదులే మతమంటే

మానవుడే సంఘజీవి సమానతే ఆదర్శం
చిన్న పెద్ద తేడాలను ఒప్పదులే మతమంటే

తేలికగా వీలుకాదు తెలుసుకొనుట ఈడూరీ
నమ్మకుంటె తనగుట్టును విప్పదులే మతమంటే

Tuesday, April 4, 2017

నా మొగుడు

ఎవరెస్టెక్కి జెండా పాతుట మరిచొస్తాడే నా మొగుడు
బజారుకెళ్ళి సరుకుల సంచీ వదిలొస్తాడే నా మొగుడు

సూటిగ చెబితె అర్థంకాదు హాస్యం అసలు బుర్రకెక్కదు
సినిమాకెడితే సీనుసీనుకి విసిగిస్తాడే నా మొగుడు

వివరంలేదు విషయంలేదు మెదడుకి పదును మచ్చుకి లేదు
డిస్కోకెళ్ళీ భరత నాట్యం చేసొస్తాడే నా మొగుడు

వంటకి వారు ముందుకు రారు తిండికి సారు దూరం కారు
సాంబార్లోకీ సగ్గుబియ్యము పోపేస్తాడే నా మొగుడు

బానెడు పొట్ట, జానెడు పొడుగు ఆటలలోన అడుగే పడదు
క్రికెట్ బంతితో టెన్నిసాటే ఆడేస్తాడే నా మొగుడు

Sunday, January 29, 2017

నీగురించి

ట్విట్టరులో ట్వీటులెన్నొ పెట్టానే నీగురించి 
ఫేస్బుక్లో లైకులెన్నొ కొట్టానే నీగురించి  

అందమైన నీఫొటోలు పదికాలాలుండేలా
ఇన్స్టాగ్రాం మెమొరీలో దాచానే నీగురించి
  
రాసుకున్న లేఖలన్ని చేయిజారి పోకుండా
వాట్సాప్లో మెసేజులే చేశానే నీగురించి

కమ్మనైన కబురులెన్నొ చెబుతావని ఆశించీ 
హ్యాంగౌట్లో ఎదురుచూపు చూశానే నీగురించి

ఈడూరిని హీరోగా చిత్రిస్తూ కథలనల్లి
వైబరులో వైభవంగ పేర్చానే నీగురించి