సరదా గజల్

కొవ్వు కరగకున్నా పర్లేదు పెరగకపోతే చాలు
రోగం కుదరకున్నా పర్లేదు ముదరకపోతె చాలు

రాత్రి సినిమాకి వెళ్ళి వస్తూంటే మా వీధిలొ కుక్క
నన్ను చూసి మొరిగినా పర్లేదు కరవకపోతె చాలు
  
సర్కారీ కొలువుల్లో నెలవైన జీతగాళ్ళు పనులు 
చేయకున్న పర్లేదు లంచం మరగకపోతే చాలు  
   
చట్టసభల కుర్చీల్లో పదిలంగా సెటిలైన వారు 
కుర్చి దిగకున్న పర్లేదు డబ్బు తినకపోతే చాలు 

పుట్టగొడుగుల్లా పుట్టుకొస్తున్న తుంటరి బాబాలు 
బోధించకున్న పర్లేదు, బాధించకపోతే చాలు 

శ్రమ పడి రాసిన ప్రేమలేఖకి ఫలితం లేదేలనో  
పిల్ల కాదన్నా పర్లేదు చెప్పుతీయకపోతె చాలు