దీపావళి

సత్యభామ శౌర్యానికి సాక్షమదియె దీపావళి
మంచిచెడుల పోరాటపు ఫలితమదియె దీపావళి

ఇంటింటా ఆనందం వెల్లివిరియు శుభతరుణం 
ఊరంతా ప్రసరించే వెలుగు నదియె దీపావళి

భూచక్రం మతాబులూ చిచ్చుబుడ్లు కాకరొత్తి
బాలలంత సంతసించు పండుగదియె దీపావళి

కార్పొరేట్లు వ్యాపారులు ఒకరేమిటి అందరూను
మిఠాయిలే పంచుకొనెడి పర్వమదియె దీపావళి

టపాకాయ పొగలతోటి గాలిలోని క్రిములన్నీ
తోకముడిచి పారిపోవు సమయమదియె దీపావళి

మార్వాడీ మారాజులు లక్ష్మిదేవి పూజ చేసి 
కొత్తపద్దు మొదలెట్టే వేడుకదియె దీపావళి

కానివారు గొంతెత్తీ కాలుష్యం అంటున్నా
ప్రజలంతా జరుపుకొనెడి పబ్బమదియె దీపావళి 

వస్తావా

నిండు గోదారిలొ పండు వెన్నెలల్లె వస్తావా 
గుండె ఎడారిలో మంచు బిందువల్లె వస్తావా

రంగురంగు కలలెన్నో నా మదిలో నింపి నీవు  
మేఘాల్లో విరిసె ఇంద్ర చాపమల్లె వస్తావా 

గుండె గుడిలొ నీ చిత్రం పెట్టి పూజ చేస్తున్నా  
పరిమళాలు జల్లు అగరు ధూపమల్లె వస్తావా

చీకట్లను చెండాడే శక్తి కదా నీకున్నది    
ధగధగా మెరిసే చంద్రకాంతమల్లె వస్తావా

ఈడూరిలొ భావుకతే నీ రూపం దాల్చుతోంది     
గజల్లోన రాసుకున్న భావమల్లె వస్తావా

సరే సరే

నా తోడిక క్షణమైనా వద్దంటే సరే సరే 
చేసుకున్న బాసలన్ని రద్దంటే సరే సరే

గులాబీల పరిమళాలు మనకేమీ కొత్త కాదు 
పువ్వు కాదు కంటకమే ముద్దంటే సరే సరే 

ఎల్లలేవి లేకుండా ప్రేమవిందుకాశపడితె 
ఇకనుండీ ముళ్ళకంచె హద్దంటే సరే సరే 

కలిసివున్న కాలంలో అనుభూతులు ఎన్నెన్నో
కలలన్నీ తెల్లారని పొద్దంటే సరే సరే

ఈడూరికి ఈ కష్టం దాటడమే తెలియనిదా 
శనిదేవుడె మనపెళ్ళికి పెద్దంటే సరే సరే 

భార్యామణి

నన్నుకొట్టి నువ్వెందుకు నవ్వుతావె భార్యామణి
కయ్యానికి కాలెందుకు దువ్వుతావె భార్యామణి

చిలికిచిలికి గాలివాన చెయ్యబోకు ప్రతివిషయం 
కాలకూట విషమెందుకు చిమ్ముతావె భార్యామణి

తప్పునాది కాదన్నది తెలిసికూడ వాదిస్తావ్ 
నేతిబీర నెయ్యినెలా అమ్ముతావె భార్యామణి

మొదటిషోకి మొదలెడితే నైటుషోకి తెములుతావు
అద్దానికి నీళ్ళనెపుడు వదులుతావె భార్యామణి

అనుష్కతో పోలిస్తే పనిపిల్లకి అప్పిస్తావ్   
అందగత్తెవంటెచాలు పొంగుతావె భార్యామణి 

హిట్లరునే మరపిస్తూ నియమాలను నిలుపుతావు
కారాలను మిరియాలను నూరుతావె భార్యామణి  

అందంగా తయారయ్యి అటువైపుకి తిరుగుతావు 
ఆశపెట్టి నీళ్ళుజల్లి కులుకుతావె భార్యామణి 

తెలియలేదు

మొదటిసారి నిన్నుచూసి మనసునెలా జార్చానో తెలియలేదు
రాసుకున్న ప్రేమలేఖ నీదరికెలా చేర్చానొ తెలియలేదు

చినదానా ఉడుముపట్టు పట్టి నీవు బిగుసుకోని కూచుంటే 
ముగ్గులోకి లాగేందుకు ఏమి వండి వార్చానో తెలియలేదు

నువ్వు వచ్చి చేరాకా రాకెట్లా సాగుతోంది ఈ పయనం 
ప్రేమలోకి దిగినాకా ఏ గేరుని మార్చానో తెలియలేదు 

పరిమళించు మనసుతోటి పల్లవిలా చేరావే ఎదలోనికి 
పాడుకున్న ప్రేమగీతికేరాగం కూర్చానో తెలియలేదు
    
ఈడూరికి నీవులేక ఘడియైనా యుగమేలే ఈ జగాన 
గొంతుదాటి జారిపడని గరళమెలా ఓర్చానో తెలియలేదు

మామూలే

దసరా అంటే సరదా తీరుట మామూలే
జేబులనిండా చిల్లులు మిగులుట మామూలే

పంతులు గారికి అయిదే రూకలు కాదండీ 
పంచినకొద్దీ చేతులు చాచుట మామూలే  

పోస్టూ పేపరు కూరలు యిస్త్రి ఒక్కరేమిటి 
ఎన్నడు అగుపడనెవరో వచ్చుట మామూలే 

కటువుగ మాటలు వదిలే కరెంటు లైనుమ్యాన్  
చేతులు ముడుచుకు ఎదురుగ నిలుచుట మామూలే

కానిస్టేబుల్ కనకారావ్ కంటికి దొరకడు  
దసరా వస్తే పళ్ళికిలించుట మామూలే    

మున్సీపాలిటి ముడుపులు చాలవు అన్నట్టుగ  
ముంగిట చేరీ నీళ్ళను నములుట మామూలే 

టైముకి ఎపుడూ రానిది గ్యాసే కద బాసూ  
పండుగనాడే సిలిండరొచ్చుట మామూలే 

అందరికన్నీ యిస్తే మిగులు చేతికి చిప్ప 
అత్తారింటికి అల్లుడు వెళ్ళుట మామూలే

మామూళ్ళిస్తే నువ్వే హీరో ఈడూరీ 
లేదని అంటే చుక్కలు చూపుట మామూలే