బేఫికర్

నింగిలోన మనజెండా ఎగురుతుంటె బేఫికర్
సరిహద్దున మనజవాను నిలిచుంటే బేఫికర్ 

భూమాతకు పచ్చబొట్టు పెట్టి మురిసిపోవుచూ  
ఆరుగాలమన్నదాత  శ్రమిస్తుంటె బేఫికర్

కులమతాలు ఏవైనా కష్టాలెన్నెదురైన  
భరతమాత బిడ్డలంత కలిసుంటే బేఫికర్

పగలుదాటి పోయాకా రాతిరవక తప్పదులె 
ఆకసాన వెలుగుదివ్వె మెరుస్తుంటె బేఫికర్
   
గాయపడిన హృదయాలకు మందున్నది ఈడూరి  
మనసులోని తడి ఎపుడూ ఆరకుంటె బేఫికర్

మేఘం

ప్రియురాలీ ప్రేమలాగ కురిసిందొక మేఘం
పట్టుజరీ అంచులాగ మెరిసిందొక మేఘం

పచ్చచీర కట్టుకున్న పుడమిలాగ నవ్వుతు 
ప్రియునిగన్న ప్రియురాలై మురిసిందొక మేఘం 

ఆకసాన నక్షత్రపు సమూహాల సాక్షిగ 
వలపువిరుల జడివానలొ తడిసిందొక మేఘం

తాజుమహలు చూడగానె పెరుగునులే ప్రేమలు 
ప్రేమగాధ స్మారకమై వెలిసిందొక మేఘం

ఈడూరీ బరువెక్కిన హృదయంతో నేడూ   
విరహినిలా చెలికాడిని కసిరిందొక మేఘం

ఉన్నావే

శంకరాభరణంలోని తులసిలాగ ఉన్నావే

బాపుగారి సినిమాలో భామలాగ ఉన్నావే

బొడ్డుమీద పండుపడితె గమ్మత్తుగ కదులుతావు

రాఘవేంద్ర చిత్రంలో రంభలాగ ఉన్నావే

కస్సుమనీ బుస్సుమనీ కసురుతూనె ఉంటావూ

కృష్ణవంశి చక్రంలో ఛార్మిలాగ ఉన్నావే

రాంగోపాలుడికి రాని ఊహలేవొ వస్తున్నాయ్

క్షణక్షణం సినిమా శ్రీదేవిలాగ ఉన్నావే

గోరింటలు పెట్టావా ఎర్రబడెను కళ్ళుకూడ

సత్యభామ వేషంలో జమునలాగ ఉన్నావే

నోరుతెరవకుండానే కబుర్లెన్నొ చెబుతావూ

ఉత్తరాది సినిమాలో రేఖలాగ ఉన్నావే

అబ్బో నీ నాటకాలు ఈడూరికి తెలియనివా

సావిత్రిని తలదన్నే తారలాగ ఉన్నావే

ఒక్కక్షణం

నీఅడుగుతొ నా అడుగులు కలపనివ్వు ఒక్కక్షణం  
నీకన్నుల ఊసులేవొ చదవనివ్వు ఒక్కక్షణం

నీరూపమె నిండివుంది అణువణువూ నామేనిలో    
నాగుండెల ప్రేమగంట మోగనివ్వు ఒక్కక్షణం

చకోరమై చూశానే నీకోసం ప్రతిక్షణమూ  
నీపెదవుల మకరందం తాగనివ్వు ఒక్కక్ష ణం 

పదహారూ అణాలెత్తు సౌందర్యం నీదేనులే  
అచ్చతెలుగు అందాలను మోయనివ్వు ఒక్కక్షణం  

ఈ కల యిక ఆగిపోవుననే భయం తొలుస్తున్నది  
నీవలపుల సుమగంధం కురవనివ్వు ఒక్కక్షణం

పదేపదే

అదిగదిగో అదోలాగ చూడమాకు పదేపదే 
చూసికూడ చూడనట్టు తిరగమాకు పదేపదే

ఎవరెంతగ వలవేసిన పడ్డవాణ్ణి కాదు నేను
గాలమేసి నా మనసే లాగమాకు పదేపదే

ఓలమ్మీ ఓపలేను ఏదేదో అవుతోందే 
ఓరకంట చూసి మరీ నవ్వమాకు పదేపదే

ఏదోలా వెంటపడీ చేరినాను నీసరసకు
దొరికినట్టె దొరికినాక జారమాకు పదేపదే 

ఈడూరిని  వదిలిపెట్టి పోవద్దే చినదానా  
అలకచూపి పుట్టింటికి చేరమాకు పదేపదే 

గుర్తుందా

బడికిదారి చూపినట్టి కాలిబాట గుర్తుందా
చింతచెట్టు నీడలొన గోళీలాట గుర్తుందా 

పడిలేస్తూ ఎగబాకుతు కొండమీదికెక్కి మరీ 
పరవశాన చూసినట్టి రాతికోట గుర్తుందా 

వాగులోన ఆడుకుంటు డస్సిపోయి దప్పికయ్యి
యిసుకలోన తవ్వుకున్న చెలమ ఊట గుర్తుందా

మంటచూసి కొరివిదయ్యమనుకుంటూ భయపడ్డాం
ఊరిబయట కాలుతోన్న చెరుకుతోట గుర్తుందా 

నీవులేక నేను లేను అనుకుంటూ ఒకరినొకరు
హత్తుకుంటు పాడుకున్న చెలిమిపాట గుర్తుందా

క్లాసులోని రెండుజెళ్ళ సీత కన్ను కొట్టిందని
ఉబుసుపోక చెప్పుకున్న గాలిమాట గుర్తుందా

సినిమాకై పడిగాపులు ఆనందమె ఈడూరికి
మొదటి ఆట టికెట్టుకై తోపులాట గుర్తుందా

సఖియా

అమాసలో వెన్నెలలే తెచ్చావే నా సఖియా
వేసవిలో చల్లదనం యిచ్చావే నా సఖియా 

వేదనగా మిగిలిందే జీవితమే ఓ క్షణాన
ఎడారిలో ఒయాసిసై వచ్చావే నా సఖియా

మన్మధుడూ నీకు పోటి రాలేడనిపించేలా
వలపు శరము గుండెలలో గుచ్చావే నా సఖియా

అలుకలోన సత్యభామ పోలికేదొ అబ్బినట్టు
మనసుపొరల లోతులలో గిచ్చావే నా సఖియా 

ఏ జన్మదొ ఈబంధం దేవుడైన చెప్పలేడు  
చూడగానె ఈడూరికి నచ్చావే నా సఖియా