ప్రేమవాన

కళ్ళనుండి ప్రేమవాన కురుస్తుందొ లేదో
మరోసారి చెలియ నన్ను కలుస్తుందొ లేదో

చెలి అందం చూడగానె చిన్నబోయె జగమే
ఆకసాన మరో తార మెరుస్తుందొ లేదో

వాలుచూపు ఒకటివిసిరి సాగిపోయె తానూ
ఘడియైనా నాగురించి తలుస్తుందొ లేదో

ఇన్నినాళ్ళ విరహగీతి ఆగిపోదు మనసా  
ఈదాసుడి నిరీక్షణం ఫలిస్తుందొ లేదో

ఏ జన్మదొ ఈ పుణ్యము ఒక్కటాయె మనసులు
మరుజన్మలొ ఈడూరిని వరిస్తుందొ లేదో

చిట్టికన్న

నాకోసం తిరిగొచ్చిన అమ్మవురా చిట్టికన్న 
ప్రేమపూలు విరబూసిన కొమ్మవురా చిట్టికన్న

నీరాకతొ తొలగిపోయె ఇంటిలోని చీకటులే 
విధిరాతను మార్చగలా బ్రహ్మవురా చిట్టికన్న

ఆట పాట మాటలతో కాలమంత గడచిపోయె 
మురిపాలను పంచిపెట్టు బొమ్మవురా చిట్టికన్న

పుట్టినింట మెట్టినింట మంచిపేరు తీసుకొచ్చి
మురిపించెడు మంచి ముద్దు గుమ్మవురా చిట్టికన్న

కష్టాలలొ - నేనున్నా అని పలుకుచు ధైర్యమొసగి   
మెరిసిపోవు నాన్న కంటి చెమ్మవురా చిట్టికన్న

నీవు లేక......

ఎప్పుడో సావిత్రిలాంటి మహానటి మీద శ్రీశ్రీలాంటి మహాకవి రాసిన ఈ పాట చిత్రీకరించారు, అది ఒక అద్భుత గీతంగా మనని అలరించింది. కానీ ఏమి పాడుతున్నామో ఏమి భావం చూపించాలో తెలియని, తెలుగు రాని మహానటీమణులున్న ఈ కాలంలో కూడా అదే పాట పాడుకుంటే ఎలా? అందుకే మీకోసం, వాళ్ళకోసం మనందరి కోసం ఇలా మార్చాను.....చదూకోండి, పాడుకోండి మీ ఇష్టం....భర్త ఊళ్ళోలేకపోతే తన విరహాన్ని తెలుపుతూ మోడర్న్ భామ ఇలా పాడుకుంటోంది. 


నీవు లేక కుక్కర్ విజిలువేయకున్నది  
ఇంటి ముందు వాకిట ముగ్గులేకున్నది  //నీవు// 

పనిమనిషి కూడా నిన్ను పలవరించె
చూసి చూసి అంట్లు తోమి వెళ్ళిపోయె 
మాసిఉన్న బట్టలు ఉతుకువారు లేరే
మాసిఉన్న బట్టలు ఉతుకువారు లేరే
వాషింగ్ మెషీను పాతదైపోయే  //నీవు//  

ఏదొ ఒకటి వండి తినేద్దామంటే   
వంటరాని నాకు తిండి కూడ కరువే 
ఆకలింక నేను ఓపలేను స్వామీ
ఆకలింక నేను ఓపలేను స్వామీ 
కర్రీ పాయింట్ కూడా దగ్గర లేదే  //నీవు//  

వాట్సప్పు నీకై తెరచి ఉంచినాను
ఫేసుబుక్కులోనూ వెతికి చూసినాను
పాసు వర్డు లేని వైఫై లాగా  
పాసు వర్డు లేని వైఫై లాగా 
ఎందుకు పనికిరాని మనిషైనాను  //నీవు// 

నీనవ్వు

అపుడే విరిసిన పారిజాతమా నీనవ్వు 
ఎదలో పూసిన ప్రేమగీతమా నీనవ్వు

అలజడి మింగిన గుండెను తాకిన సమీరం 
వడిగా దూకిన సుజలపాతమా నీనవ్వు

కనులే చూడని కలగా మిగిలిన ప్రేయసీ 
ప్రేమను లేపే సుప్రభాతమా నీనవ్వు 

వడిగా లేచిన సంద్రపు కెరటం నామనసు   
కోర్కెలు పెంచే అతిమారుతమా నీనవ్వు 

హ్రుదిలో ఎపుడూ నిన్నే చూసెను ఈడూరి 
నిందలు అంటని స్వనిపునీతమా  నీనవ్వు 

మన భూమి

వేదాలకు జన్మనిచ్చి వెలుగొందిన భూమి మనది

జంతువులకు విలువనిచ్చి పూజించిన భూమి మనది

వాత్సాయన వరాహుడూ ఆర్యభట్ట చరకుడూను

పరిశోధన విజయాలను సాధించిన భూమి మనది

వాల్మీకీ వేద వ్యాసు కాళిదాసు పోతనలూ

ఆనాడే కలాలనూ కదిలించిన భూమి మనది

తక్షశిలా పుష్పగిరీ నలందాలు ఆనాడే

చదువులమ్మ నిలయాలుగ భాసిల్లిన భూమి మనది

రుద్రమ్మా దుర్గావతి చాందు బీబి ఝాన్సి లక్ష్మి 

మహిళలనూ అందలాలు ఎక్కించిన భూమి మనది

అన్నమయ్య రామదాసు త్యాగరాజు కబీరులూ

భగవంతుని మనసారా కీర్తించిన భూమి మనది

గౌతముడూ వివేకుడూ గురునానకు మహవీరుడు

మతాలలో మానవతను వివరించిన భూమి మనది

కూచిపూడి కధాకళీ భరతనాట్యమొడిస్సీల

భరతమాత పరవశాన నర్తించిన భూమి మనది

వందలాది ఏళ్ళు మనని బానిసలుగ చూసినట్టి

తెల్లవాడి గుండెలలో నిదురించిన భూమి మనది

ఖుదీరాము భగతుసింగు ఆజాదూ రామరాజు  

దేశానికి ప్రాణాలను అర్పించిన భూమి మనది

విజయలక్ష్మి ఇందిరమ్మ కిరణు బేడి పీటి ఉషా 

ఆడదబల కాదంటూ నినదించిన భూమి మనది

మొఘలాజం మాయబజార్ లగానులూ షోలేలూ

అద్భుతాలు వెండితెరకు చూపించిన భూమి మనది

గుల్జారూ ఆరుద్రా వేటూరీ సిరివెన్నెల

కమ్మనైన గీతాలను రచియించిన భూమి మనది 

కపిలుదేవు గోపిచందు మేరికోము సానియాలు

క్రీడలలో జయపతాక ఎగరేసిన భూమి మనది

అంతరిక్ష యాత్రలలో ఆరితేరి ఈడూరీ         

అరుణ గ్రహం పైకి కూడ లంఘించిన భూమి మనది

    

దారి

మగ్గంపై మగ్గుతున్న నేతన్నలకేది దారి?
వాన కొరకు వేచియున్న రైతన్నలకేది దారి ?

స్టైనులెస్సు గిన్నె మరిగి మట్టిపాత్రలొద్దంటే
కుండలనే నమ్ముకున్న కుమ్మరన్నకేది దారి?

విదేశాల మద్యమిపుడు పరవళ్ళే తొక్కుతుంటె   
ముంతకల్లు అమ్ముతున్న గీతన్నలకేది దారి?

ఆచారం అడుగంటిన ఆధునికులు ఎక్కువయ్యె  
వేదాలను చదువుకున్న బాపనన్నకేది దారి?

అడవులన్ని అంతరించి రగులుతున్న లోకంలో  
వెదురు బుట్టలల్లుతున్న మేదరన్నకేది దారి?

కాముడివే

రాతిరేళ తనువంతా ప్రవహిస్తూ కాముడివే   
సరసమాడు వేళలలో అలరిస్తూ శ్యాముడివే

ఒంటరిగా నేనుంటే ఉబుసుపోక కూచుంటే    
ముద్దులాటపాటలలో మురిపిస్తూ బాలుడివే

తోడు నీడ ఔతానని పెళ్ళిలోన బాసచేసి 
కడదాకా ననునీతో నడిపిస్తూ దేవుడివే  

నిమిషమైన ఆడజాతి నిలువలేని లోకంలో
కంచుకవచమన్నట్టుగ రక్షిస్తూ ధీరుడివే

పైడి లేడి మోజు పడిన సీత నేను కాకుండా 
చుట్టుముట్టు కష్టాలను తొలగిస్తూ రాముడివే

అలుముకున్న చీకట్లను దాటించే చెలికాడా    
బతుకంతా వెన్నెలలే కురిపిస్తూ సోముడివే

దిష్టిచుక్క లేకుండా కుదరదుగా ఈడూరీ
ఈజన్మకు నామనసే దోచేస్తూ చోరుడివే

స్నేహితుడు

కష్టం వస్తే తోడుగ నిలిచే వాడే స్నేహితుడు 
కాటికి కూడా నీతో నడిచే వాడే స్నేహితుడు

నలుపూ తెలుపూ రంగులు ఎపుడూ ఒకటే కాకున్న 
బేధం మరచీ ఒకటిగ మెదిలే వాడే స్నేహితుడు 

ఎదలో ఎన్నో అలలే విసురుగ వలలే వేస్తున్న  
మనసుతొ నీపై మధువును చిలికే వాడే స్నేహితుడు

నీలో తననే చూస్తూ నిరతం నీతో రమిస్తూ 
శూన్యం లోనూ ప్రేమై కురిసే వాడే స్నేహితుడు

వందలు వేలూ మనుషులు ఎందుకు లేవోయ్ ఈడూరి 
అమాస నాడూ నీకై మెరిసే వాడే స్నేహితుడు

షుక్రియ

నీతో గడిపిన క్షణాలన్నిటికి షుక్రియ 
నాకే ఇచ్చిన సుఖాలన్నిటికి షుక్రియ 

దివిలో వెలసిన దేవత భువికే వచ్చీ   
నాపై కురిసిన వరాలన్నిటికి షుక్రియ

తెలుపగ తరమా చెలియా మదిలో భావం  
పదాలు అల్లిన కవితలన్నిటికి షుక్రియ

నుదుటన రాసిన రాతలు ఏమైనాయో
మనకై మారిన గీతలన్నిటికి షుక్రియ

ఒకరికి ఒకరై ఎపుడూ నిలవాలంటూ 
అక్షతలేసిన చేతులన్నిటికి షుక్రియ

రెక్కలు తొడిగిన ఊహల విజయ నివేదన    
పెదాలు పంచిన మధువులన్నిటికి షుక్రియ

కలిసిన తనువుల లక్ష్యము వెన్నెల గమనం  
సుధలే చిలికిన రాత్రులన్నిటికి షుక్రియ

అక్షరాలు

కాగితాల తోటలలో తిరగాలని ఉంది నాకు 
అక్షరాలు సున్నితంగ తాకాలని ఉంది నాకు 

జీవితాన నాన్నలాగ పాఠాలను నేర్పునట్టి
పుస్తకమే మస్తకమని పాడాలని ఉంది నాకు

సువాసనలు వెదజల్లగ ఎందుకోయి అత్తరులూ
గ్రంధాలే సుగంధాలు చాటాలని ఉంది నాకు

పారుతున్న ఏరులాగ సంస్కృతినే ప్రవహించే
పుస్కాలకు ఆనకట్ట కట్టాలని ఉంది నాకు

ఎవరికైన ఏకాంతం అంతులేని ఆవేదనె 
కితాబులే స్నేహితులని తెలపాలని ఉంది నాకు

ఈబుక్కూ తాళపత్రమేదైతేనేమిగాని
బుక్కులనే కానుకగా ఇవ్వాలని ఉంది నాకు 

గుండెలపై పుస్తకాన్ని పెట్టుకునీ ఈడూరీ
సంతసముగ ఊపిరులే వదలాలని ఉంది నాకు

జిందగీ

ఎన్నొ ఏళ్ళ మధ్యంలా ఊరిస్తోంది జిందగీ 
ఎదురింట్లో పిల్ల లాగ కవ్విస్తోంది జిందగీ

అందనిదే అందినట్టు అల్లరులే చేస్తుంటే   
ఎడారిలో ఎండమావి అనిపిస్తోంది జిందగీ 

కన్ను మూసి తెరుచు లోపు కనుమరుగౌ తారలాగ
మనసుతోటి దోబూచులె ఆడిస్తోంది జిందగీ

ఏ నిముషం ఏమగునో ఎవరికెరుక ఈజగతిలొ 
సంద్రంలో కెరటంలా పడిలేస్తోంది జిందగీ 

ఐదేళ్ళకు ఒక్కసారి అగుపించే నాయకుడా
అన్నట్టుగ ఒకోసారి మురిపిస్తోంది జిందగీ

తప్పొప్పులు అతిసహజం నాటకాలు జీవితాలు 
టీవీలలొ సీరియల్సు మరిపిస్తోంది జిందగీ  

అమాయకపు చేపపిల్ల నువ్వేనా ఈడూరీ 
నెమ్మదిగా ఎరవేసీ వలలేస్తోంది జిందగీ 

గోదావరి

నింగినుండి జారిపడ్డ మెరుపల్లే మెరుస్తోంది గోదారీ 
పుష్కరాల శోభలన్ని తనలోనే పరుస్తోంది గోదారీ   

కలకాలం కనులవిందు కలిగిస్తూ పాడిపంటలందిస్తూ
గోదావరి జిల్లాలకు తన ప్రేమే పంచుతోంది గోదారీ 
  
కొండలలో కోనలలో వాగులతో వంకలతో పదము కలిపి
చక్కనైన జానపదుల గీతాలను పాడుతోంది గోదారీ

ఎల్లెడలా పరుగులెడుతు ఆరుగాలమలరిస్తూ నీరిస్తూ   
రైతన్నల కంటి నీరు తనచేత్తో తుడుస్తోంది గోదారీ 

ఈడూరీ పాపికోండలొకవైపూ పంట చేలు ఒకవైపూ 
ప్రకృతియను పట్టు చీర కట్టుకునీ మురుస్తోందీ గోదారీ

వాన

నిన్ను మొదటిసరి చూసినప్పుడు
నా మీద పడిన వర్షపు చుక్క
నీ నుదుటి సింధూరంగా మారుతుందని 
ఆ క్షణాన నాకు తెలియదు

చేయీ చేయీ కలిపి
పార్కులూ సినిమాలూ అంటూ 
తిరిగినప్పుడు నీ నవ్వుల నుండి 
జారిన ముత్యాలు...చిరుజల్లులా
నన్ను ఆసాంతం తడిపేశాయి  

నెత్తిన జీలకర్రా, బెల్లం పెట్టిన వెంటనే
కురిసిన వాన 
భద్రాచల సీతారాముల కళ్యాణం
గుర్తు చేసింది కదూ!!!!!! 

ఆపై మన ప్రేమ సునామీకి
ఆ నాటి కుంభవృష్టే బినామీ


తొలిసంతానాన్ని చేతులలోకి 
తీసుకున్నప్పుడు పడ్డ తొలకరి
మనసులని కూడా తడిపేసింది

రైన్ రైన్ గో అవే అంటూ పిల్లలు
రైములు పాడుతుంటే మన నుండి ఎవరో
ఏదో లాగేసుకుంటున్న వేదన...

పిల్లలు పెరుగుతున్న కొద్దీ
ప్రతి రోజూ వరాల జల్లే 
అంతు చిక్కడం లేదు
ఇది ఏ మేఘ సందేశమో!!!!!!!!!!!! 

నాకోసం

ఒక అందం నాకోసం నడచి వచ్చింది
తనువంతా పానుపుగా పరచి వచ్చింది 

గత జన్మల పుణ్యాలే నన్ను వరించే 
ఆ దేవత చిరునామా మరచి వచ్చింది 

ప్రేమంటే ఎపుడైనా జనులకి లోకువ 
ఈ సమాజ సంకెళ్ళను విరిచి వచ్చింది

నాకేమిటి పొమ్మంటూ ఎదురు పోరాడి 
ఎద గదులను విపులంగా తెరిచి వచ్చింది 

చెలి కన్నుల కదలాడిన మలయ సమీరం  
ఈడూరీ నీ వలపుకి సురుచి వచ్చింది

రాజకీయం

నోట్లతోటి వోటర్లను కొంటున్నది రాజకీయం 
మాటలతో కోటలనే కడుతున్నది రాజకీయం 

దగాకోరు నాయాళ్ళను గెలిపించీ ఎన్నికలలో    
పక్కలోన బల్లెములు గుచ్చుతున్నది రాజకీయం

మనమంతా తెలుగేలే అంటూనే సెగలుపెడుతూ         
ఇంటిలోన చిచ్చులను రేపుతున్నది రాజకీయం

మతాలనే పావులుగా వదులుతుంది జనాలపైకి 
మానవతా విలువలను మాపుతున్నది రాజకీయం  

ఈడూరీ మేలుకోక తప్పదుగా ఇప్పుడైనా
భవితపైన ఆశలను చంపుతున్నది రాజకీయం 

నాకిష్టం

నే చేరిన గమ్యం కాదోయ్ నే చేసిన పయనం నాకిష్టం 
జనులిచ్చిన కితాబు కాదోయ్ నే రాసిన కవనం నాకిష్టం 

జగమంతా ఒక కుగ్రామము నేడు జనులంతా ఒక కుటుంబము   
నీ యిల్లొ నా యిల్లొ కాదోయ్ మనముండే భువనం నాకిష్టం 

తుది ఎపుడూ ఆరంభమే సృష్టి అంతా జీవ పరిణామమే  
కనుమూసే మరణం కాదోయ్ తిరిగొచ్చే జననం నాకిష్టం

నీ చేతి ఊతం అందిస్తే ప్రతివాడూ విజయుడే కాడా   
మది గుచ్చే మాటలు కాదోయ్ బలమిచ్చే వచనం నాకిష్టం 

ఒక నవ్వే చాలుగ అలసిన మనసంతా మల్లెలు పరిచేందుకు  
పై పూతల ముఖాలు కాదోయ్ నిండైన హసనం నాకిష్టం

అభివృద్దే నీ మంత్రం నిభద్దతే నీ అస్త్రం ఈడూరీ 
భయపెట్టే యామిని కాదోయ్ వెలుగిచ్చే కిరణం నాకిష్టం      

అంటారు

అమ్మ ఒడిని ఎవరైనా స్వర్గమనే అంటారు 
జన్మభూమినెవరైనా తల్లి అనే అంటారు
  
డబ్బున్నా లేకున్నా బాల్యం బహు పసందే 
ఆ రోజులు మరెప్పుడూ రానివనే అంటారు 

నూనూగు యవ్వనమూ ఆ నూతన పరిచయాలు   
తొలి ప్రేమను ఎవరైనా మధురమనే అంటారు 

దాన గుణం నీకుంటే సంపదతో పనేమిటి   
ఆదుకుంటె ఎవరైనా రాజువనే అంటారు 

ఒకడితో నీకెందుకు నీ మంచిని నువ్వు పంచు  
మొరుగు కుక్కలెపుడైనా కరవవనే అంటారు

తాత పేరు చెప్పుకుని మనవళ్ళ మేకప్పులా     
నేతి బీర లోన నెయ్యి ఉండదనే అంటారు 

మనసులోన సౌందర్యం నింపి చూడు ఓ చెలీ  
నిన్ను చూసి ఎవరైనా రంభవనే అంటారు

టెక్నాలజి మనిషికిపుడు ప్రాణవాయువౌతోంది 
నెట్టు లేక క్షణమైనా నరకమనే అంటారు 

పట్టు విడకు ఈడూరీ రాస్తూనే ఉండు మరి 
నేడు కాదు రేపైనా మంచివనే అంటారు  

మారదు లోకం

భానుడే పశ్చిమాన ఉదయించినా మారదు లోకం
రాముడే మరోసారి జన్మించినా మారదు లోకం  

ట్రాఫిక్కు చిక్కులే, ఏ రోడ్డైనా శవాల గుట్టలె    
వాసుదేవుడే రధం నడిపించినా మారదు లోకం 

కాలుష్యాల కోరలలో కరడు గట్టినా హృదయాలు   
శివుడే ఈ గరళాలు కబళించినా మారదు లోకం      

నేరమూ ఘోరమూ దినచర్యలు ఈ పుణ్య భూమిలో    
బ్రహ్మ దేవుడే మరల సృష్టించినా మారదు లోకం 

చౌకబారు చదువులతో తరిగిపోయె ఘన విజ్ఞానం 
మన వేదాలను తిరగ రాయించినా మారదు లోకం 

ఈడూరికి బాగా తెలుసునండి యిది పాడు ప్రపంచం   
ముక్కోటి దేవతలూ కరుణించినా మారదు లోకం 

సెల్ఫీ

అపుడే పుట్టిన పాపాయికి అమ్మతో సెల్ఫీ
కొత్తగ పెళ్ళైన అమ్మాయికి అత్తతొ సెల్ఫీ  

అహరహము పదవికి వెంపర్లాటె రాజకీయం
లీడరుకి దొరకక దొరికిన కుర్చీతో సెల్ఫీ  

న్యాయ దేవతకి కళ్ళే లేవు - కాదనగలమా     
మన కండల వీరుడికేమో జడ్జీతొ సెల్ఫీ

రెండాకులు ఎక్కువే చదివిన అమ్మగారికీ  
అందాక పదవి కాపాడిన చెంచాతొ సెల్ఫీ 

చిన్ననాటి చిలిపి గుర్తులు మాసిపోతే యెలా  
అల్లరి పిల్లాడికి టీచర్ బెత్తంతొ సెల్ఫీ    
     
డబ్బుకి లోకం దాసోహమే అది నిజమేగా 
బాగా బలిసిన ఆసామికి ఆకలితొ సెల్ఫీ 

ఆసుపత్రికి అప్పుడపుడు వెడితేనే మంచిది    
రోజూ వచ్చె పేషంటు నర్సమ్మతో సెల్ఫీ 
  
ఎపుడూ చూస్తూ ఉంటె స్నేహం పెరగదా యేంటి
గజదొంగ గంగులు గాడికి పోలీసుతొ సెల్ఫీ  

మనుషులకేనా ప్రేమ, మాకు కూడా ఉందంటు 
అడవిలొ సింహానికి కుందేలు పిల్లతొ సెల్ఫీ   

తుదిదాక తపస్సు చేస్తె వచ్చేది ఏ దేవుడొ 
మధ్యలోనే ఆపిన మునికి మేనకతొ సెల్ఫీ      

పోనీ

చెలీ ఈ క్షణమిలా కాలమాగిపోనీ 
నీతోనె ఉన్న మధురోహ సాగిపోనీ

ప్రేమను చూసి ఓర్వలేని మాయ లోకం   
చెక్కిన కుటిల శాసనాలు వీగిపోనీ

మల్లెలు పూసిన వెన్నెల సాయంత్రాలూ  
నీ వలపుల మత్తులో చెలరేగిపోనీ 

యామినికేమి తెలుసు భామిని  సౌందర్యం  
శృంగార గంగలో నన్ను మునిగిపోనీ

నిన్ను మించు అందము లేనే లేదు కదా
రంభా ఊర్వశులకు గర్వమణగిపోనీ  

అమ్మా నా పెళ్ళెప్పుడు?

అందరూ ఆడపిల్ల వద్దనుకుని అబ్బాయిలనే కంటుంటే ముందు ముందు అమ్మాయిలు మరింత తగ్గిపోయి అబ్బాయిలకి పెళ్ళిళ్ళు కాని పరిస్థితి వస్తుంది ఆ రోజుల్లో అబ్బాయిల పాట్లు ఎలా ఉంటాయో ఈ గజల్ వివరిస్తుంది, ఆ రోజులు ఆల్రెడీ వచ్చేశాయనుకోండి కానీ ఇంకాస్త చెయ్యిదాటిపోతే: 


వయసు మీద పడుతోంది అమ్మా నా పెళ్ళెప్పుడు?
మనసు ఆగనంటోంది అమ్మా నా పెళ్ళెప్పుడు?

పేరయ్యలు, పెళ్ళి సైట్లు అన్నిటిని గాలించా  
పిల్ల దొరకనంటోంది అమ్మా నా పెళ్ళెప్పుడు?

వంద పెళ్ళి చూపులూ ఎపుడో దాటేశానూ   
మ్యాచ్ కుదరకుంటోందీ అమ్మా నా పెళ్ళెప్పుడు?

నా వయసు అమ్మాయిలు ఎపుడో తల్లులయారే 
ఖర్మ కాలిపోతోంది అమ్మా నా పెళ్ళెప్పుడు?

లేనిపోని ఊహేదో మనసు దొలిచివేస్తోంది
నిప్పు రాజుకుంటోంది అమ్మా నా పెళ్ళెప్పుడు?
       
ఆడపిల్లలొద్దనుట ఈ ఖర్మకు కారణమా  
కన్ను తెరుచుకుంటోంది అమ్మా నా పెళ్ళెప్పుడు?

చేరుకుంటావు

కన్ను కన్ను కలపకనే జారుకుంటావు
లోలోపల నన్నే నువు కోరుకుంటావు  

చూడనట్టుగ నా ఎదుటే నడిచి వెడుతూ     
తలనుతిప్పి వెనకెనకే చూసుకుంటావు 

నక్కి నక్కీ నేనెచటో దాగి ఉంటే
మదిలోనే విరహ గీతి పాడుకుంటావు  

నే నడిచిన దారిలో ఏ మాయ ఉందో 
వంగి వంగి ఏదొ తీసి దాచుకుంటావు 

ఒక్క చూపు తగ్గినా ఆగునా కాలం  
అనుక్షణం నాకొరకే కాచుకుంటావు

వేల పున్నముల వెన్నెలే కద నీ ప్రేమ   
కాదన్నా ఈడూరిని చేరుకుంటావు 

ప్రపంచ హాస్య దొనోత్సవ సందర్భంగా

ఇంటికి చుట్టాలొచ్చినా ఫేసు బుక్కు పోస్టే
పెళ్ళాం ఊరికి వెళ్ళినా ఫేసు బుక్కు పోస్టే  

నిజాయితి కనుమరుగైన ఈనాటి లోకములో 
ఆటోవాడు మీటరేసినా ఫేసు బుక్కు పోస్టే
  
మీటలు నొక్కితే పనులైపోతాయి మహిళలకి 
పనిమనిషి రాకపోయినా ఫేసు బుక్కు పోస్టే  

అంకెలతొ గారడీలు చేసే స్కూళ్ళకు కరువా 
పిల్లోడికి ర్యాంకొచ్చినా ఫేసు బుక్కు పోస్టే 

నచ్చిన హీరో సినిమా మొదటి ఆట చూడాలి  
హాల్లోన సీటు దొరికినా ఫేసు బుక్కు పోస్టే  

శతృవులకి ఏమి జరిగినా ఆనందమే కదా   
అత్తగారు జారిపడినా ఫేసు బుక్కు పోస్టే     

తొలి సంతానం కోతికి కొబ్బరి కాయ లాటిది 
చంటి బిడ్డ బట్ట తడిపినా ఫేసు బుక్కు పోస్టే  

ఈడూరీ ఇదెక్కడి మాయలోకమో చూడర 
ఎంత చెత్త కవిత రాసినా ఫేసు బుక్కు పోస్టే  

నేటి స్కూళ్ళు

బెత్తముతో బాదుతాయి చిన్న పిల్లలను నేటి స్కూళ్ళు 
విత్తముతో బాదుతాయి తల్లి తండ్రులను నేటి స్కూళ్ళు  

తల్లి ఒడిలొ నేర్చుకున్న తేట తేట తెలుగు పదాలను  
ఉచ్చరిస్తే ఉతుకుతాయి విద్యార్ధులను నేటి స్కూళ్ళు   

మార్కులంటూ ర్యాంకులంటూ మానసికంగ వేధిస్తు  
నీరసంలో ముంచుతాయి చిన్నారులను నేటి స్కూళ్ళు 

డాక్టరువో ఇంజనీరొ అవ్వడమే నీ లక్ష్యమంటు  
చిన్న వాటిగ చూస్తాయి ఇతర వృత్తులను నేటి స్కూళ్ళు
     
టీవి లోన రోజు మొత్తం గొంతు చించుకుని అరుస్తూ 
తారుమారుగ చూపిస్తాయి ఫలితాలను  నేటి స్కూళ్ళు 

లేనిపోని స్పర్ధలను పెంచుతూ మరీ పేట్రేగుతూ  
పగవారిగా  మారుస్తాయి సహచరులను నేటి స్కూళ్ళు

కామాంధుల కొమ్ము కాస్తూ కారుణ్యం నేలరాస్తూ      
మొగ్గలోనే తుంచుతాయీ బాలికలను నేటి స్కూళ్ళు 

ఈడూరీ ఇంకా నీకు తెలియదంటె యిక తెలుసుకో  
ఎడారి లాగ మార్చుతాయి తెలుగునేలను నేటి స్కూళ్ళు  

ఆవకాయ

మండుటెండలో మంచు వానరా తెలుగు వారికి ఆవకాయ 
ఎడారి బాటలొ నీటి ఊటరా ఇంటి నారికి ఆవకాయ  

ముద్ద పప్పూ మంచి నెయ్యీ వేడి అన్నం కలిపి కొడితివా
ఆగకుండా జారిపోదా మరి కడుపులోనికి ఆవకాయ

చేదు వగరుల మేలు కలయిక తాగుబోతుకి అమృతమ్మేగద  
గొంతు లోకి జారగా స్వర్గమే మందుబాబుకి ఆవకాయ 

బతుకు నడవనీ పూటగడవనీ  బక్కచిక్కిన జనానికీ    
ఉంటే చాలుగ అదే పదివేలు బీదవానికి ఆవకాయ 

వివాహమంటే అది మాటలా మర్యాదలెంతగ చెయ్యాలొ
దొరకలేదంటే కుదరదోయీ పెళ్ళి విందుకి ఆవకాయ 

నేడు ఉండీ రేపు పోయే ఆస్తులదేముంది ఈడూరీ   
చెక్కుచెదరని సొత్తు గదరా మన తెలుగు జాతికి ఆవకాయ

టీవీలు మాకొద్దు

నిజాలన్న్ని నిర్భయంగా చిత్రించని టీవీలు మాకొద్దు 
అన్యాయాన్ని అనునిత్యం ఎదిరించని టీవీలు మాకొద్దు

అత్తాకోడళ్ళంటే ఎపుడూ పిల్లీ ఎలుకల కధేనా?
యిళ్ళల్లోన చిరు ప్రేమలు పూయించని టీవీలు మాకొద్దు 

పాత వంటకాలతో పాట్లు పడే యాంకర్లను చూశారా?
నోరూరే  కొత్త వంటల రుచి పంచని టీవీలు మాకొద్దు
   
వచ్చీరాని తెలుగుతో వంకర్లు తిరిగే యాంకర్ల గోల 
తేనెలూరే  తెలుగు పదం వినిపించని టీవీలు మాకొద్దు

మనిషి మనిషికి మధ్య మంచు గోడలు కట్టుటా పాత్రికేయం?
మానవత్వపు మధురిమలను కురిపించని టీవీలు మాకొద్దు

అందానికి మెరుగులనిచ్చేది మొహానికి పూసే రంగులా?
మనసులోపలి సౌందర్యం చూపించని టీవీలు మాకొద్దు 

యువతీ యువకులనగానే రోజంతా ఆట పాటలేనా?   
సమస్యలపై యువశక్తిని మళ్ళించని టీవీలు మాకొద్దు 

ఊసుపోని ఆటలే గృహలక్ష్మిని మహాలక్ష్మి చేస్తాయా?
మహిళామణుల చైతన్యం రగిలించని టీవీలు మాకొద్దు

వీక్షకునికి వినోదమే ప్రధానం కాదు కదా ఈడూరీ
అంతో ఇంతొ విజ్ఞానం అందించని టీవీలు మాకొద్దు

కామన్

పేగును తెంచీ ప్రేమను పంచుట తల్లికి కామన్ 
పళ్ళను కాసీ రుచులను పంచుట చెట్లకి కామన్

ఎక్కడ చూడూ లీడరులంతా స్కాముల స్వాములె  
వోట్లను వేసీ పదవులు పంచుట ప్రజలకి కామన్ 

టీచరు బెత్తం దరువులు లేకా విద్యలు రావే
చదువులు నేర్పీ తెలివిని పంచుట గురువుకి కామన్
   
ఒకటికి ఒకటీ ఫ్రీగా వస్తే కొంటారంతా
రేటుని పెంచీ డొస్కౌంట్ పంచుట విపణికి కామన్
   
ఆటోవాడికి అడిగిన ఛార్జీ ఇవ్వక తప్పదు
మీటరులాపీ మోసం పంచుట వాళ్ళకి కామన్  

డబ్బెంతున్నా హీరోయిన్లకి బట్టలు కరువే 
అందం చూపీ ఆశలు పంచుట వీళ్ళకి కామన్  

మధ్యం తాగితె ఇల్లూ ఒళ్ళూ రెండూ గుల్లే 
బుధ్ధిని తుంచీ మత్తుని  పంచుట మందుకి కామన్  

ఉన్మాది గాడికి ప్రేయసి దొరుకుట ఎపుడు సులువే 
ప్రేమలు నటించి యాసిడ్ పంచుట వాడికి కామన్
   
అందరిలాగే నువ్వూ రాస్తె చాలదు ఈడూరి    
మంచిని చెప్పీ హాస్యం పంచుట గజలుకి కామన్ 

బాధెందుకు?

వెన్నెల లేదేమని బాధెందుకు? నీ నవ్వుల జల్లుండగా
భానుడు రాలేదని బాధెందుకు? నీ ప్రేమల వెలుగుండగా 

వేసవిలోన చల్లగాలి ఆశించుట కూడా తప్పేనా?
మల్లెల వాసన లేదని బాధెందుకు? నీ ఊహల తావుండగా

ఆకాశంలో పక్షిలా ఎగరడమదెంత కష్టం నాకూ  
మేఘాల జాడేదని బాధెందుకు? నీ ఊహల తోడుండగా

ఏడారిలో దాహాలకు లోటంటూ ఏముందిలే ప్రియా 
ఒయాసిస్సు లేదని బాధెందుకు? నీ అధరామృతముండగా   

ఏడేడు జన్మాల బంధాలు నిజమో కాదో తెలియదు మరి
ఎడబాటు తలచి బాధెందుకు? నా చేతిలొ నీ చేయుండగా

సిని-మాయే

చిటికెలు వేస్తే సుమోలు లేస్తే అది సినిమాయే 
ఒకటే గుండుకి నలుగురు ఛస్తే అది సినిమాయే 

రౌడీ గాడిని హీరో గారూ ఒకటే దెబ్బతొ     
పాతాళంలోనికి పాతేస్తే అది సినిమాయే 

బాల్యంలోనే ఎపుడొ తిరునాళ్ళలొ తప్పిపోయిన
అన్న తమ్ముడు మళ్ళీ కలిస్తే అది సినిమాయే 

పూటకు గడవని కూలీ నాలీ చేయని వాడిని
డబ్బున్నోళ్ళ పిల్ల ప్రేమిస్తే అది సినిమాయే

అమలాపురములో అమ్మాయి గారు ఉన్నట్టుండి    
అమెరికాలోన డ్యాన్సే చేస్తే  అది సినిమాయే

విదేశాలలో పెరిగిన హీరో ఇండియాకొచ్చి
ఎకరాలెకరాలుగ పండిస్తే  అది సినిమాయే   

ఈడూరీ ఇక లాభంలేదూ నువ్వూ నేనూ
తోచిందేదో తీసిపారేస్తే అది సినిమాయే

నువ్వే గుర్తొచ్చావు

ఆ పాపాయ్ నవ్వు చూస్తే నువ్వే గుర్తొచ్చావు
ఓ కెరటం ఎగిరి లేస్తే నువ్వే గుర్తొచ్చావు  

నిన్నో మొన్నో చిగురులు తొడిగిన నునులేత మొక్క 
ఈ ఉదయం మొగ్గ వేస్తే నువ్వే గుర్తొచ్చావు

పున్నమి రేయి ప్రకృతి అందం విడిగా చెప్పాలా 
మది నిండ వెన్నెల కురిస్తె నువ్వే గుర్తొచ్చావు

గాలి ఈల వేసింది ఏదేదొ గోల చేసింది
ఊహలకే ఊపిరులొస్తె నువ్వే గుర్తొచ్చావు 

వసంతమొస్తే వలపులు చిగురులు తొడుగుట సహజం  
కొమ్మల్లో కోయిల కూస్తె నువ్వే గుర్తొచ్చావు
   
కొండల్లో పారే నది నీ నడుమె అనిపించింది 
గంగమ్మకు హరతులిస్తే నువ్వే గుర్తొచ్చావు 

ఈడూరికి ఎంత ఇష్టమో ఆ లేత కిరణాలు 
గదిలోకి వెలుగుని తెస్తే నువ్వే గుర్తొచ్చావు

చూడాలని ఉంది

వేల నెమళ్ళు నాట్యం చేస్తే చూడాలని ఉంది
కోయిల గుంపులు రాగం తీస్తె చూడాలని ఉంది

అనంత విశ్వపు అందాలన్నీ దేవుడి సృష్టే   
అంతటి దైవం ఎదురుగ వస్తె చూడాలని ఉంది

వేషం భాష వేరైనా మానవ జాతి ఒకటే 
మనిషీ మనిషి కలిసి నడిస్తే చూడాలని ఉంది

మనిషితనమే కరువైన ఈ కాలపు రోజుల్లో    
మంచితనం వానై కురిస్తే చూడాలని ఉంది

ఉన్మాదమే ప్రేమగ భావించె పాషాణాలకి 
మనసులే మల్లెలుగా పూస్తే చూడాలని ఉంది  

కల్తీ లేనిది ఏదీలేని ప్రస్థుత తరుణంలొ  
అమ్మ ప్రేమను ఇల్లాలిస్తే చూడాలని ఉంది  

అందరు మెచ్చే పని అద్భుతమేగా ఈడూరీ      
ఇలాటి జన్మ మళ్ళీ వస్తే చూడాలని ఉంది    

అంతా మాయే

 నేతలు నీతులు చెబుతామంటే అంతా మాయే
దొంగలు మంచిగ అవుతామంటే అంతా మాయే 
రోజుకి చెంచా కన్నీరొదలని మహిళలు గలరా 
వనితలు టీవీ చూడము అంటే అంతా మాయే
పొరుగున ఇంట్లో కూరని తింటే రుచియే కాదా 
భర్తలు భార్యని పొగుడుతు ఉంటే అంతా మాయే  
చదువులు వదిలి ఛాటింగు చేయుట ఫ్యాషను నేడూ 
పిల్లలు నెట్టుకి దూరము అంటే అంతా మాయే 
మతాలు అన్నీ మనిషిని మనిషిగ మార్చుటకేగా 
ముష్కర మూకలు జీహాదంటే అంతా మాయే 
టీవీ తారకి ఏవీ రావని తెలిసిందేగా
చక్కని తెలుగూ వచ్చని అంటే అంతా మాయే 
కామెడి అంటే వెకిలి చేష్టలూ వెటకారాలూ 
బూతులు వదిలీ బుధ్ధిగ ఉంటే అంతా మాయే  
తేరగ వచ్చే డబ్బుని చూస్తే ఆశే మనకూ 
వరుడే కట్నం వద్దని అంటే అంతా మాయే      
నోటికి వచ్చిందేదో రాసి పారేస్తే యెలా
ఈడూరి రాయడమొచ్చని అంటే అంతా మాయే   

సరదా గజల్

కొవ్వు కరగకున్నా పర్లేదు పెరగకపోతే చాలు
రోగం కుదరకున్నా పర్లేదు ముదరకపోతె చాలు

రాత్రి సినిమాకి వెళ్ళి వస్తూంటే మా వీధిలొ కుక్క
నన్ను చూసి మొరిగినా పర్లేదు కరవకపోతె చాలు
  
సర్కారీ కొలువుల్లో నెలవైన జీతగాళ్ళు పనులు 
చేయకున్న పర్లేదు లంచం మరగకపోతే చాలు  
   
చట్టసభల కుర్చీల్లో పదిలంగా సెటిలైన వారు 
కుర్చి దిగకున్న పర్లేదు డబ్బు తినకపోతే చాలు 

పుట్టగొడుగుల్లా పుట్టుకొస్తున్న తుంటరి బాబాలు 
బోధించకున్న పర్లేదు, బాధించకపోతే చాలు 

శ్రమ పడి రాసిన ప్రేమలేఖకి ఫలితం లేదేలనో  
పిల్ల కాదన్నా పర్లేదు చెప్పుతీయకపోతె చాలు 

చూసుకో

నిన్ను నువ్వు ఒకసారి పరికించి చూసుకో

పేరుకున్న మలినాల్ని కరిగించి చూసుకో

చిన్ని చిన్ని సరదాలె గద జీవితమంటే

మళ్ళీ బాలుడివై పులకించి చూసుకో

ఒక్కసారే కద వచ్చేది మానవ జన్మ

నీ నోట మంచి మాట పలికించి చూసుకో

చిల్లర తగాదాలు ప్రగతికే అగాధాలు

అనుమానపు తెరలన్ని తొలగించి చూసుకో

వారు లేక నీకు రాదుగదా ఈ ఉనికి

అమ్మ నానల్ని సదా అలరించి చూసుకో

నీకు తోడుగా రాదుగ ఎంత డబ్బున్నా

అభాగ్యుల జీవితాలు మురిపించి చూసుకో

మనిషి మనిషి కాకుంటె మనిషికేది మనుగడ

మానవత్వమె ఎపుడూ కురిపించి చూసుకో

నిరంతరం మారేది మార్పే కద ఈడూరి

పాషాణ హృదయాలను కదిలించి చూసుకో

ఎందుకో

మనసు యింతగా ఎగిరి పడుతోంది ఎందుకో
లోకం కొత్తగా కనబడుతోంది ఎందుకో 

తను నిన్న  తిరిగిన పూల తోటే కదా ఇది
గులాబి వింతగ మిడిసిపడితోంది ఎందుకో 
  
ఆమె గానము చెవులనింకా తాకుతోందా
కోయిల అంతగ మధనపడుతోంది ఎందుకో

ఊహలెంతగ అల్లగలవో ప్రణయ బంధము      
మది పులకింతగ పరుగుపెడుతోంది ఎందుకో 

చెలిమోముతో పోల్చినందుకేమో జాబిలి      
పాలపుంతగా మురిసిపడుతోంది ఎందుకో 

ఈడూరి చెలిని చేరే సమయమేమో ఇది
తనువు యింతగా తపన పడుతోంది ఎందుకో