షుక్రియ

నీతో గడిపిన క్షణాలన్నిటికి షుక్రియ 
నాకే ఇచ్చిన సుఖాలన్నిటికి షుక్రియ 

దివిలో వెలసిన దేవత భువికే వచ్చీ   
నాపై కురిసిన వరాలన్నిటికి షుక్రియ

తెలుపగ తరమా చెలియా మదిలో భావం  
పదాలు అల్లిన కవితలన్నిటికి షుక్రియ

నుదుటన రాసిన రాతలు ఏమైనాయో
మనకై మారిన గీతలన్నిటికి షుక్రియ

ఒకరికి ఒకరై ఎపుడూ నిలవాలంటూ 
అక్షతలేసిన చేతులన్నిటికి షుక్రియ

రెక్కలు తొడిగిన ఊహల విజయ నివేదన    
పెదాలు పంచిన మధువులన్నిటికి షుక్రియ

కలిసిన తనువుల లక్ష్యము వెన్నెల గమనం  
సుధలే చిలికిన రాత్రులన్నిటికి షుక్రియ