వాన

నిన్ను మొదటిసరి చూసినప్పుడు
నా మీద పడిన వర్షపు చుక్క
నీ నుదుటి సింధూరంగా మారుతుందని 
ఆ క్షణాన నాకు తెలియదు

చేయీ చేయీ కలిపి
పార్కులూ సినిమాలూ అంటూ 
తిరిగినప్పుడు నీ నవ్వుల నుండి 
జారిన ముత్యాలు...చిరుజల్లులా
నన్ను ఆసాంతం తడిపేశాయి  

నెత్తిన జీలకర్రా, బెల్లం పెట్టిన వెంటనే
కురిసిన వాన 
భద్రాచల సీతారాముల కళ్యాణం
గుర్తు చేసింది కదూ!!!!!! 

ఆపై మన ప్రేమ సునామీకి
ఆ నాటి కుంభవృష్టే బినామీ


తొలిసంతానాన్ని చేతులలోకి 
తీసుకున్నప్పుడు పడ్డ తొలకరి
మనసులని కూడా తడిపేసింది

రైన్ రైన్ గో అవే అంటూ పిల్లలు
రైములు పాడుతుంటే మన నుండి ఎవరో
ఏదో లాగేసుకుంటున్న వేదన...

పిల్లలు పెరుగుతున్న కొద్దీ
ప్రతి రోజూ వరాల జల్లే 
అంతు చిక్కడం లేదు
ఇది ఏ మేఘ సందేశమో!!!!!!!!!!!!