కాముడివే

రాతిరేళ తనువంతా ప్రవహిస్తూ కాముడివే   
సరసమాడు వేళలలో అలరిస్తూ శ్యాముడివే

ఒంటరిగా నేనుంటే ఉబుసుపోక కూచుంటే    
ముద్దులాటపాటలలో మురిపిస్తూ బాలుడివే

తోడు నీడ ఔతానని పెళ్ళిలోన బాసచేసి 
కడదాకా ననునీతో నడిపిస్తూ దేవుడివే  

నిమిషమైన ఆడజాతి నిలువలేని లోకంలో
కంచుకవచమన్నట్టుగ రక్షిస్తూ ధీరుడివే

పైడి లేడి మోజు పడిన సీత నేను కాకుండా 
చుట్టుముట్టు కష్టాలను తొలగిస్తూ రాముడివే

అలుముకున్న చీకట్లను దాటించే చెలికాడా    
బతుకంతా వెన్నెలలే కురిపిస్తూ సోముడివే

దిష్టిచుక్క లేకుండా కుదరదుగా ఈడూరీ
ఈజన్మకు నామనసే దోచేస్తూ చోరుడివే