నా మొగుడు

ఎవరెస్టెక్కి జెండా పాతుట మరిచొస్తాడే నా మొగుడు
బజారుకెళ్ళి సరుకుల సంచీ వదిలొస్తాడే నా మొగుడు

సూటిగ చెబితె అర్థంకాదు హాస్యం అసలు బుర్రకెక్కదు
సినిమాకెడితే సీనుసీనుకి విసిగిస్తాడే నా మొగుడు

వివరంలేదు విషయంలేదు మెదడుకి పదును మచ్చుకి లేదు
డిస్కోకెళ్ళీ భరత నాట్యం చేసొస్తాడే నా మొగుడు

వంటకి వారు ముందుకు రారు తిండికి సారు దూరం కారు
సాంబార్లోకీ సగ్గుబియ్యము పోపేస్తాడే నా మొగుడు

బానెడు పొట్ట, జానెడు పొడుగు ఆటలలోన అడుగే పడదు
క్రికెట్ బంతితో టెన్నిసాటే ఆడేస్తాడే నా మొగుడు