నవ్విందీ

రాములోరు గుర్తొచ్చిన సీతలాగ నవ్విందీ 
నల్లనయ్య రూపుగన్న రాధలాగ నవ్విందీ 

పసితనాలు చిందించే అందమైన మోముతనది
చనుబాలను చవిచూసిన పాపలాగ నవ్విందీ

తిమిరాలను తరిమేసే చక్కనైన చూపుతనది
చీకటేల నింగిలోని చుక్కలాగ నవ్విందీ

నవ్వుతుంటె రతనాలే రాలినట్టు ఉంటుందీ   
జారుతున్న జలపాతపు హోరులాగ నవ్విందీ 

సందుజూసి సరసమాడ బోతుంటే జారుకునీ
పెద్దపులిని ఓడించిన జింకలాగ నవ్విందీ 

మనసుపడీ గెలుచుకున్న సఖునిజూసి నాచెలియే 
తనబిడ్డను చూసి మురియు తల్లిలాగ నవ్విందీ  

గమ్మత్తుగ మత్తులోకి లాగుతోంది ఈడూరిని 
శృంగారపు మరులు గొన్న రంభలాగ నవ్విందీ